ডিজিটেল ডেস্কঃ ছিংগাপুৰৰ ৰাষ্ট্ৰপতি পদৰ নিৰ্বাচনত ভাৰতীয় মূলৰ থৰ্মন শ্বনমুগাৰত্নমে জয়লাভ কৰিছে। ৰয়টাৰৰ তথ্য অনুসৰি শুকুৰবাৰে (১ ছেপ্টেম্বৰ) নিৰ্বাচন বিভাগে ঘোষণা কৰে যে শ্বনমুগাৰত্নমে ৭০.৪ শতাংশ ভোট লাভ কৰি জয়লাভ কৰিছে।
শুকুৰবাৰে (১ ছেপ্টেম্বৰ) ছিংগাপুৰত নৱম ৰাষ্ট্ৰপতি নিৰ্বাচনৰ বাবে ভোটগ্ৰহণ কৰা হয়। য’ত বৃহৎ সংখ্যক লোকে অংশগ্ৰহণ কৰিছিল। ছিংগাপুৰত ২৭ লাখৰো অধিক লোকে ভোটদানৰ যোগ্যতা অৰ্জন কৰাৰ লগতে নিশা ৮ বজালৈ ভোটগ্ৰহণ কেন্দ্ৰ খোলা আছিল। ইয়াৰ পাছত ভোট গণনা আৰম্ভ হ’ল।
৬৬ বছৰীয়া থাৰ্মান শ্বানমুগাৰত্নমৰ উপৰিও ৰাষ্ট্ৰপতি পদৰ বাবে আন দুজন প্ৰাৰ্থী আছিল - চৰকাৰী কোম্পানী এটাৰ প্ৰাক্তন বিনিয়োগ মুৰব্বী এন কক ছং আৰু চৰকাৰী বীমা কোম্পানী এটাৰ প্ৰাক্তন মুৰব্বী টান কিন লিয়ান৷
থাৰ্মান শ্বনমুগাৰত্নম ছিংগাপুৰৰ উপ-প্ৰধানমন্ত্ৰী হিচাপে কাৰ্যনিৰ্বাহ কৰি আহিছে। তেওঁ শিক্ষা আৰু বিত্তমন্ত্ৰীৰ পদতো অধিষ্ঠিত হৈ আহিছে। ২০০১ চনত ৰাজনীতিত প্ৰৱেশ কৰা শ্বনমুগাৰত্নমে দুটা দশকৰো অধিক সময় শাসকীয় পিপলছ একচন পাৰ্টি (পিএপি)ৰ সৈতে ৰাজহুৱা খণ্ড আৰু মন্ত্ৰী পদত কাৰ্যনিৰ্বাহ কৰি আহিছে।ছিংগাপুৰৰ বিদায়ী ৰাষ্ট্ৰপতি হালিমা ইয়াকোবৰ কাৰ্যকাল ১৩ ছেপ্টেম্বৰত শেষ হ’ব। তেওঁ দেশৰ প্ৰথমগৰাকী মহিলা ৰাষ্ট্ৰপতি হিচাপে পৰিগণিত হৈছে। ২০১৭ চনৰ ছিংগাপুৰৰ ৰাষ্ট্ৰপতি নিৰ্বাচনত সংৰক্ষিত নিৰ্বাচনত কেৱল মালয় সম্প্ৰদায়ৰ সদস্যসকলকহে প্ৰতিদ্বন্দ্বিতা কৰিবলৈ দিয়া হৈছিল।
সেই সময়ছোৱাত হালিমাক ৰাষ্ট্ৰপতি হিচাপে মনোনীত কৰা হৈছিল কাৰণ আন কোনো প্ৰাৰ্থী তাত নাছিল। ২০১১ চনৰ পিছত ছিংগাপুৰত এইটোৱেই প্ৰথম ৰাষ্ট্ৰপতি নিৰ্বাচন।উল্লেখ্য যে ১৯৯৩ চনৰ ২৮ আগষ্টত ছিংগাপুৰত প্ৰথম ৰাষ্ট্ৰপতি নিৰ্বাচন অনুষ্ঠিত হয়।
Continue Reading
