ডিজিটেল ডেস্কঃসংবাদ মাধ্যমৰ স্বাধীনতাৰ গোলকীয় সূচকত ভাৰতৰ স্থান যথেষ্ট অৱনমিত হৈছে বুলি যি প্ৰতিবেদন প্ৰকাশ পাইছে সেয়া মানি ল’বলৈ অস্বীকাৰ কৰিছে ভাৰত চৰকাৰে। চলিত বৰ্ষৰ মে’ মাহত প্ৰকাশিত তালিকাখনত প্ৰকাশ পোৱা মতে সংবাদমাধ্যৰ স্বাধীনতাৰ ক্ষেত্ৰত বিশ্বৰ ১৮০ খন দেশৰ ভিতৰত ভাৰতৰ স্থান পূৰ্বৰ ১৪২ ৰ পৰা ১৫০ সংখ্যক স্থানলৈ অৱনমিত হৈছিল। কিন্তু চৰকাৰে এই প্ৰতিবেদন মুঠেও নামি ল’ব বিচৰা নাই।
বৃহস্পতিবাৰে ৰাজ্যসভাৰ মজিয়াত এক লিখিত প্ৰশ্নৰ উত্তৰত তথ্য আৰু সম্প্ৰচাৰ মন্ত্ৰী অনুৰাগ ঠাকুৰে ৱৰ্ল্ড প্ৰেছ ইনডেক্সৰ প্ৰস্তুত কৰোতে গ্ৰহণ কৰা পদ্ধতি সম্পৰ্কে প্ৰশ্ন উত্থাপন কৰে। মন্ত্ৰীগৰাকীয়ে ৰাজ্যসভাৰ দুগৰাকী সাংসদ ক্ৰমে মল্লিকাৰ্জুন খাৰ্গে আৰু সঞ্জয় সিঙৰ প্ৰশ্নৰ উত্তৰ দি কয় যে চৰকাৰে সংবিধানৰ ১৯ অধ্যায়ত উল্লেখ কৰা বাক স্বাধীনতা সুৰক্ষিত কৰিবলৈ সদায় চেষ্টা কৰি আছে।
একে সময়তে তেওঁ স্মৰণ কৰে যে প্ৰেছ কাউন্সিল অফ ইণ্ডিয়া (পিচিআই) প্ৰেছ কাউন্সিল আইন, ১৯৭৮ অনুসৰি স্থাপন কৰা হৈছিল। ইয়াৰ উদ্দেশ্য আছিল সংবাদ মাধ্যমৰ স্বাধীনতা সুৰক্ষিত কৰা। সংবাদ মাধ্যম বিপদাপন্ন হোৱাৰ যিকোনো অভিযোগ প্ৰেছ কাউন্সিল অফ ইণ্ডিয়াই চোৱা-চিতা কৰি আহিছে। এইক্ষেত্ৰত ভাৰতত সাংবাদিকৰ বাক স্বাধীনতাৰ গ্ৰাফ কিদৰে নিম্নগামী হ’ব পাৰে বুলিও মন্ত্ৰীগৰাকীয়ে প্ৰশ্ন কৰে।
তেওঁ দাবী কৰে যে অতি কম সংখ্যক 'নমুনা'পৰীক্ষা কৰি এনে প্ৰতিবেদন প্ৰকাশ কৰা হৈছে।তেওঁ এইটোও দাবী কৰে যে ৱৰ্ল্ড প্ৰেছ ইনডেক্সৰ প্ৰস্তুত পদ্ধতিত বহুতো ত্ৰুটি আছে। ইফালে, মল্লিকাৰ্জুন খাৰ্গেই শেহতীয়াকৈ কিমান জন সাংবাদিকক গ্ৰেপ্তাৰ কৰা হৈছে বুলি কৰা প্ৰশ্নৰ উত্তৰত হিচাবে কেন্দ্ৰীয় মন্ত্ৰীগৰাকীয়ে একো ক’ব নোৱাৰিলে ।
তেওঁ মাথো কয় যে ৰাষ্ট্ৰীয় অপৰাধ ৰেকৰ্ড ব্যুৰোৱে সাংবাদিকসকলৰ বিষয়ে পৃথকে এনে কোনো তথ্য সংৰক্ষণ নকৰে। উল্লেখ্য অল্টনিউজৰ প্ৰতিষ্ঠাপক মহম্মদ জুবেইৰক গ্ৰেপ্তাৰ কৰাৰ পিছতে দেশত সংবাদ মাধ্যমৰ স্বাধীনতাৰ বিষয়ে নতুন প্ৰশ্ন উত্থাপন কৰিছিল।
জুবেইৰৰ গ্ৰেপ্তাৰৰ পিছতে কেৱল দেশতে নহয়, বিদেশতো প্ৰতিবাদৰ ঢৌ উঠিছিল। অৱশেষত বুধবাৰে জুবেইৰক জামিন দিয়া হৈছিল।
Continue Reading
