ভাৰতত সৰ্বত্ৰ ইডিৰ জাল : দোষী সাব্যস্ত হৈছে ২৫গৰাকী লোক

ডিজিটেল ডেস্ক: কেন্দ্ৰীয় চৰকাৰৰ অধীনস্থ প্ৰৱৰ্তন সঞ্চালকালয়, চমুকৈ ইডিয়ে এতিয়ালৈকে ভাৰতত ২৫গৰাকী লোকক ধনৰ অবৈধ সৰবৰাহৰ বাবে দোষী সাব্যস্ত কৰিছে৷ দেশৰ আদালতসমূহৰ দ্বাৰা মুঠ ২৫গৰাকী লোকক ধনৰ অবৈধ সৰবৰাহৰ অপৰাধৰ বাবে দোষী সাব্যস্ত কৰা হৈছে, আনহাতে প্ৰায় ১৭ বছৰ আগতে প্ৰৱৰ্তন সঞ্চালকালয়ক গুৰুতৰ বিত্তীয় অপৰাধৰ তদন্ত কৰাৰ ক্ষমতা দিয়াৰ পাছত ৪০০ৰো অধিক গ্ৰেপ্তাৰ কৰা হৈছে।

চৰকাৰী তথ্য অনুসৰি, প্ৰৱৰ্তন সঞ্চালকালয়ে (ইডি) ‘মানি লণ্ডাৰিং প্ৰতিৰোধ আইন’ৰ (পিএমএলএ) অপৰাধী ধাৰাৰ অধীনত প্ৰায় ৫,৪২২টা গোচৰ বা এনফৰ্চমেণ্ট কেছ তথ্য প্ৰতিবেদন (ইচিআইআৰ) দাখিল কৰিছে৷  আনহাতে ইডিয়ে ২০২২ৰ মাৰ্চলৈ জাৰী কৰা ১,৭৩৯টা আদেশৰ অংশ হিচাপে (অস্থায়ীভাৱে) ১,০৪,৭০২ কোটি টকাৰ সম্পত্তি জব্দ কৰিছে৷

ইডিক ২০০২চনত প্ৰণয়ন কৰা পিএমএলএ-ৰ কঠোৰ ব্যৱস্থাবোৰ ২০০৫ৰ ১ জুলাইৰ পৰা বলবৎ কৰাৰ দায়িত্ব দিয়া হৈছিল। আইনখনে সংস্থাটোক তদন্ত পৰ্যায়ত অভিযুক্তক মাতিবলৈ, গ্ৰেপ্তাৰ কৰিবলৈ, সম্পত্তি জব্দ কৰিবলৈ আৰু অপৰাধীসকলক আদালতৰ সন্মুখত মোকৰ্দমা চলাবলৈ ক্ষমতা প্ৰদান কৰিছিল। তথ্য অনুসৰি ফেডাৰেল সংস্থাটোৱে একে সময়তে আদালতৰ সন্মুখত মুঠ ৯৯২টা অভিযোগপত্ৰ বা গোচৰৰ অভিযোগ দাখিল কৰিছিল।

বিষয়াসকলৰ মতে দোষী সাব্যস্ত হোৱা সকলৰ ভিতৰত আছে ড্ৰাগছ সৰবৰাহ, বিদেশলৈ প্ৰৱঞ্চনামূলক ধন প্ৰেৰণ, সন্ত্ৰাসবাদীক পুঁজি যোগান আৰু চৰকাৰী পুঁজিৰ দুৰ্নীতিৰ গোচৰত অভিযুক্ত৷ সংস্থাটোৱে দেশৰ কিছুমান হাইপ্ৰফাইল লোকৰ তদন্ত কৰি আছে, যাৰ ভিতৰত আছে শীৰ্ষ ৰাজনীতিবিদ, আমোলা, ব্যৱসায়িক গোট, কৰ্পোৰেট গোষ্ঠী, বিদেশী নাগৰিক আৰু আন কিছুমান মানি লণ্ডাৰিং বিৰোধী আইনৰ অধীনত। বৈদেশিক মুদ্ৰা ব্যৱস্থাপনা আইন (ফেমা)ৰ তথ্যই দেখুৱাইছে যে সংস্থাটোৱে ৩১ মাৰ্চলৈকে ৩০,৭১৬টা গোচৰৰ তদন্ত আৰম্ভ কৰিছে।

১৯৭৩ চনৰ বৈদেশিক মুদ্ৰা নিয়ন্ত্ৰণ আইন (এফ.ই.আৰ.এ.) বাতিল কৰাৰ পিছত ১৯০৯ চনত অসামৰিক প্ৰক্ৰিয়াৰ সৈতে এক আইন ‘ফেমা’ প্ৰণয়ন কৰা হৈছিল। ১৫,৪৯৫টা ফেমা গোচৰত তদন্ত নিষ্পত্তি কৰা হৈছিল আনহাতে ৮,১০৯টা গোচৰত কাৰণ দৰ্শোৱাৰ জাননী, অনুসন্ধান সম্পূৰ্ণ হোৱাৰ পিছত জাৰি কৰা হৈছিল। ইয়াৰ ভিতৰত ৬,৪৭২টা কাৰণ দৰ্শোৱাৰ জাননী প্ৰদান কৰা হৈছিল বা চূড়ান্ত কৰা হৈছিল বুলি তথ্যত কোৱা হৈছে।

সংস্থাটোৱে ২০১৮ চনৰ পলাতক অৰ্থনৈতিক অপৰাধী আইনৰ অধীনত আদালতৰ দ্বাৰা পলাতক অৰ্থনৈতিক অপৰাধী (এফ.ই.ও.)ৰ বাবে আবেদন কৰা ১৪জনৰ ভিতৰত নজন লোকক অপৰাধী ঘোষণা কৰিছে। বিজয় মালিয়া আৰু নীৰৱ মোডীকে ধৰি বহু কোটি টকাৰ বেংক জালিয়াতিৰ গোচৰত অভিযুক্ত ব্যৱসায়ীসকল আদালতৰ দ্বাৰা এফইঅ’ ঘোষণা কৰাসকলৰ ভিতৰত আছে।