ভবানীপুৰত হাৰিবই মমতা বেনাৰ্জী:কিন্তু কাৰ এই ভৱিষ্যতবাণী?

ডিজিটেল ডেস্ক: ভবানীপুৰ সমষ্টিৰ উপ নিৰ্বাচনত সন্মান ৰক্ষাৰ যুঁজত অৱতীৰ্ণ হ’ব ৰাজ্যখনৰ মুখ্যমন্ত্ৰী মমতা বেনাৰ্জী। সমষ্টিটোত তেওঁক পৰভূত কৰিবলৈ ইতিমধ্যেই টঙালি বান্ধিছে বিজেপি দলেও। দলটোৱে প্ৰাৰ্থী হিচাপে আগবঢ়াইছে প্ৰিয়ংকা টিব্ৰেওৱালক।

ইতিমধ্যেই মমতাৰ বিৰুদ্ধে এখন মনোবৈজ্ঞানিক যুঁজো চলাই গৈছে বিজেপি নেতৃত্বই। সম্ভৱত: মমতাৰ ওপৰত চাপ সৃষ্টিৰ লক্ষ্যৰেই বিজেপিৰ নেতাসকলে বাৰম্বাৰ নিজৰ নিশ্চিত বিজয়ৰ দাবী কৰি আহিছে। গেৰুৱা শিবিৰৰ নেতা শ্বাহনৱাজ হুছেইনে আজি কয়, “ নন্দীগ্ৰামৰ দৰেই আমি জয়ী হ’ম ভবানীপুৰত”।একেই আত্মবিশ্বাসী মন্তব্য ৰাজ্যিক বিজেপিৰ সভাপতি দীলিপ ঘোষৰো। তেওঁ কয়, “ প্ৰিয়ংকা আমাৰ এগৰাকী যুঁজাৰু নেত্ৰী।আমি মমতা বেনাৰ্জীক চাৰি মাহ আগেয়েই পৰাভূত কৰিছো”।

উল্লেখ্য যে বিগত বিধানসভা নিৰ্বাচনত নন্দীগ্ৰাম সমষ্টিৰ পৰা প্ৰতিদ্বন্দ্বিতা কৰি বিজেপি প্ৰাৰ্থী শুভেন্দু অধিকাৰীৰ হাতত প্ৰায় ২০০০ ভোটত পৰাভূত হৈছিল মমতা বেনাৰ্জী।মুখ্যমন্ত্ৰীত্বৰ আসন ধৰি ৰাখিবলৈ হ’লে ৩০ ছেপ্টেম্বৰত অনুষ্ঠিতব্য বিধানসভা নিৰ্বাচনত তেওঁ বিজয়ৰ হাঁহি মাৰিবই লাগিব।