‘ভেলেণ্টাইন দিৱস’ত কলেজত তালিবানী ফৰমান! ছাত্ৰীয়ে পিন্ধিব লাগিব হিজাব

ডিজিটেল ডেস্কঃ ‘ভেলেণ্টাইন দিৱস’ত পাকিস্তানৰ ৰাজধানীৰ এখন চিকিৎসা মহাবিদ্যালয়ৰ সকলো শিক্ষাৰ্থীলৈ তালিবানী ফৰমান জাৰি কৰা হৈছে। এই ফৰমানত কোৱা হৈছে যে ‘ভেলেণ্টাইন দিৱস’ত সকলো ছাত্ৰীয়ে হিজাব পিন্ধিব আৰু সকলো ছাত্ৰই ছাত্ৰীৰ পৰা অতিকমেও ২০০ মিটাৰ দূৰত্ব বজাই ৰখাৰ উপৰি পিন্ধিব লাগিব বগা নামাজ টুপীও। লগতে নিৰ্দেশনা অনুসৰি মহাবিদ্যালয়ৰ কৰ্মচাৰীসকলে কলেজ চৌহদৰ ভিতৰত টহল দিব যাতে কোনো শিক্ষাৰ্থীয়ে এই নিৰ্দেশনা ভংগ নকৰে। শিক্ষাৰ্থীসকলক ‘ভেলেণ্টাইন দিৱস’ উদযাপনৰ পৰা নিষিদ্ধ কৰা হৈছে। ‘ফ্ৰাইডে টাইমছ’ৰ এক প্ৰতিবেদন অনুসৰি শনিবাৰে ইছলামাবাদ আন্তঃৰাষ্ট্ৰীয় চিকিৎসা মহাবিদ্যালয়খনত ‘ভেলেণ্টাইন দিৱস’ উদযাপন আৰু ইয়াৰ সৈতে সম্পৰ্কিত সকলো অনুষ্ঠানত অংশগ্ৰহণৰ পৰা বিৰত থাকিবলৈ কোৱা হৈছে, এনেধৰণৰ অনুষ্ঠানে যুৱকসকলক ভুলপথে পৰিচালিত কৰাৰ আশংকা ব্যক্ত কৰিছে। ইছলামাবাদ আন্তঃৰাষ্ট্ৰীয় চিকিৎসা মহাবিদ্যালয়ৰ নিৰ্দেশনা অনুসৰি বিদ্যালয়ৰ সকলো ছাত্ৰীৰ মূৰত থাকিব এখনকৈ স্কার্ফেৰে সৰ্বশৰীৰ ভালদৰে ঢাকি ৰাখিব লাগিব। ইয়াৰ উপৰি সকলো শিক্ষাৰ্থীয়ে প্ৰাৰ্থনাৰ সৈতে বগা টুপী পিন্ধিব লাগিব। এই ফৰমান উলংঘা কৰা শিক্ষাৰ্থীসকলক বিহা হ’ব জৰিমনা। নিৰ্দেশ মৰ্মে মহাবিদ্যালয়ৰ কৰ্মচাৰীসকলে মহাবিদ্যালয়ৰ চৌহদত টহল দিব যাতে কোনো শিক্ষাৰ্থীয়ে এই নিৰ্দেশনা ভংগ নকৰে। অন্যথা নিৰ্দেশনা উলংঘা কৰা শিক্ষাৰ্থীসকলক বিহা হ’ব জৰিমনা। উল্লেখ্য যে, ইছলামাবাদৰ আন্তঃৰাষ্ট্ৰীয় চিকিৎসা মহাবিদ্যালয়খন ১৯৯৬ চনতেই স্থাপিত হৈছিল আৰু এই চিকিৎসা মহাবিদ্যালয়খন ৰিফা আন্তঃৰাষ্ট্ৰীয় বিশ্ববিদ্যালয়ৰ অন্তৰ্গত।