ডিজিটেল ডেস্কঃ সকলো কৰ্মচাৰীয়ে মাহৰ শেষত দৰমহালৈ বৰ আশাৰে ৰৈ থাকে। মাহৰ শেষত বা নতুন মাহটোৰ আৰম্ভণিতে মোবাইলত অহা দৰমহাৰ মেছেজটোৱে সকলোৰে মনত বৰ আনন্দ দিয়ে। বহু মানুহেই সেই মেছেজটো আহিব আহিব বুলি ঘনে ঘনে মোবাইলটোলৈ চাই থাকে। দৰমহা পোৱাৰ দিনা যেতিয়া আপোনাৰ দৰমহা ২৮৬ গুণ বৃদ্ধি হ’ব আৰু আপোনাৰ একাউণ্টত ক্ৰেডিট হ’ব তেতিয়া আপোনাৰ কেনে অনুভৱ হ’ব।
হয়, আপুনি ঠিকেই শুনি আছে। একেবাৰে বিশ্বাস কৰিব নোৱাৰা এটা ঘটনা বাস্তৱত সংঘটিত হৈছে। দৰমহা সম্পৰ্কীয় এটা অনন্য ঘটনা পোহৰলৈ আহিছে য'ত এটা কোম্পানীয়ে ভুলতে নিজৰ কৰ্মচাৰীৰ একাউণ্টত ৪৩ হাজাৰ টকাৰ সলনি ১.৪ কোটি টকা দৰমহা হিচাপে ট্ৰেন্সফাৰ কৰিলে। এই ঘটনা চিলিৰ। কৰ্মচাৰীজনে চিলিৰ এটা সুপৰিচিত কোম্পানীত কাম কৰিছিল।
যাৰ দৰমহা মাহে ৪৩ হাজাৰ টকা আছিল, কিন্তু কোম্পানীটোয়ে কৰিলে এক বৃহৎ ভুল। ভুলতে কোম্পানীটোৱে কৰ্মচাৰীজনৰ একাউণ্টত ক্ৰেডিট কৰিলে তেওঁৰ প্ৰকৃত দৰমহাৰ ২৮৬ গুণ। কৰ্মচাৰীজনৰ একাউণ্টত ৪৩ হাজাৰ টকাৰ সলনি সোমাইছিল ১ কোটি ৪২ লাখ টকা। এই বিশাল ধনৰাশি লাভ কৰি কৰ্মচাৰীজনে অন্য এটা কাৰণ উল্লেখ কৰি চাকৰিৰ পৰা লগেলগে পদত্যাগ কৰে।
কোম্পানীয়ে যেতিয়া তেওঁক টকা ঘূৰাই বিচাৰিছিল তেতিয়া তেওঁ কোম্পানীক প্ৰতিশ্ৰুতি দিছিল যে তেওঁ সোনকালে টকা ঘূৰাই দিব। অৱশ্যে টকা ঘূৰাই দিয়াৰ পূৰ্বেই তেওঁ নিৰুদ্দেশ হয়। এতিয়া এই ঘটনাটো ছ'চিয়েল মিডিয়াত ভাইৰেল হৈ পৰিছে।
Continue Reading
