ভয়ংকৰ : ৰাজ্যত এদিনতে কৰ’নাই প্ৰাণ কাঢ়িলে ১১জনৰ, আক্ৰান্ত প্ৰায় ৭ হাজাৰ

ডিজিটেল ডেস্ক : দেশত আৰম্ভ হৈছে কৰ’নাৰ তৃতীয় ঢৌ। দৈনিক বৃদ্ধি পাইছে সংক্ৰমণ। দেশত এদিনতে ২লাখ ৫৮হাজাৰ আক্ৰান্ত চিনাক্ত হোৱাটো অশনি সংকেট বিবেচিত হৈছে। সমান্তৰালভাৱে বৃদ্ধি পাইছে চিকিৎসাদীন ৰোগীৰ সংখ্যাও। ক’ভিডৰ নতুন প্ৰকাৰ অ’মিক্ৰণৰ সংক্ৰমণে দেশজুৰি তীব্ৰ ৰূপ ধাৰণ কৰাৰ পাছত দেশৰ প্ৰায় সকলো প্ৰান্ততে সতৰ্কতামূলক ব্যৱস্থা গ্ৰহণ কৰিবলৈ বাধ্য হৈ পৰিছ চৰকাৰ তথা প্ৰশাসন। অসমতো অব্যাহত আছে কৰ’নাৰ দ্ৰুত সংক্ৰমণ। দৈনিক সংক্ৰমণ বৃদ্ধিৰ ঘটনাই অসমৰ স্বাস্থ্যখণ্ডলৈও সংকট কঢ়িয়াই আনিছে। সোমবাৰৰ দিনটোত অসমত পুনৰ ৬,৯৮২জন ক’ভিড আক্ৰান্ত চিনাক্ত হৈছে। ৰাজ্যত কৰা ৬৪,৯১৯টা ক’ভিড পৰীক্ষাত এইসকল আক্ৰান্ত চিনাক্ত হয়। সংক্ৰমণৰ হাৰ এতিয়া বৃদ্ধি হৈছে ১০.৭৫শতাংশলৈ। কামৰূপ মেট্ৰ’ত ১৪৯১জন আক্ৰান্ত চিনাক্ত হৈছে। তাৎপৰ্যপূৰ্ণভাৱে কৰ’নাত মৃতৰ সংখ্যাও বৃদ্ধি পাইছে। আজিৰ দিনটোত ১১জন লোক কৰ’নাত মৃত্যু হোৱাৰ ভয়ংকৰ পৰিসংখ্যা পোহৰলৈ আহিছে। ইফালে আৰোগ্যৰ হাৰ হৈছে ৯৫.১৮শতাংশ। কৰ’নাৰ এই দ্ৰুত সংক্ৰমণ তথা মৃতৰ সংখ্যা বৃদ্ধি ৰাজ্যৰ স্বাস্থ্যখণ্ডৰ বাবেও উদ্বেগৰ কাৰণ হৈ পৰিছে। চৰকাৰে নৈশ সান্ধ্য আইনকে ধৰি বিভিন্ন ক’ভিড প্ৰতিৰোধী নীতি বলৱৎ কৰিছে যদিও জনগণৰ সচেতনতাইহে চৰকাৰৰ প্ৰচেষ্টা ফলৱতী কৰিব।