ডিজিটেল ডেস্ক: গুৱাহাটীৰ বেলতলৰাৰ বশিষ্ঠপুৰৰ বহু চৰ্চিত পত্নী হত্যাকাণ্ডৰ অভিযুক্ত ৰামানুজ গোস্বামীৰ মৃত্যু হৈছে। পত্নী ৰিয়া তালুকদাৰক ৰামানুজে নৃশংসভাৱে শিৰচ্ছেদ কৰি হত্যা কৰাৰ ঘটনাই দেশজুৰি চাঞ্চল্যৰ সৃষ্টি কৰিছিল। আৰক্ষীৰ জিম্মাত থকা ৰামানুজ গোস্বামীয়ে সোমবাৰে পুৱতি নিশা পলায়নৰ চেষ্টা চলোৱাৰ সময়তে সংঘটিত এক দুৰ্ঘটনাত তেওঁৰ মৃত্যু হয়।
প্ৰাপ্ত তথ্য অনুসৰি, GMCHলৈ স্বাস্থ্য পৰীক্ষাৰ বাবে নিয়াৰ সময়তে নৰকাসুৰ পাহাৰৰ পৰা জঁপিয়াই পলায়নৰ চেষ্টা কৰে ৰামানুজে। আৰক্ষীৰ গাড়ীৰ পৰা জঁপিয়াই পলায়নৰ চেষ্টা কৰোতে পাহাৰৰ পৰা পৰি যায় ৰামানুজ। কাহিলীপাৰাৰ নৰকাসুৰ পাহাৰৰ পথত সংঘটিত হয় এই দুৰ্ঘটনা। GMCHত চিকিৎসকে মৃত ঘোষণা কৰে ৰামানুজ গোস্বামীক।
উল্লেখ্য যে, কিছুদিন পূৰ্বে গুৱাহাটীৰ বেলতলাৰ বশিষ্ঠপুৰস্থিত এটা ফ্লেটত পত্নী ৰিয়া তালুকদাৰক অতি নিৰ্মমভাৱে হত্যা কৰি মৃতদেহৰ মুণ্ডচ্ছেদ কৰাৰ লগতে মূৰটো ফ্ৰিজৰ ভিতৰত পলিথিনত ভৰাই থৈছিল ৰামানুজে। ৬ ছেপ্টেম্বৰত পোহৰলৈ আহিছিল হত্যাকাণ্ডৰ কথা।
এই লোমহৰ্ষক ঘটনাটোৱে সকলোৰে বুকু কঁপাই তুলিছিল। ঘটনাৰ পিছতে অভিযুক্ত ৰামানুজে নিজেই আৰক্ষীৰ ওচৰত আত্মসমৰ্পণ কৰিছিল আৰু আদালতৰ নিৰ্দেশমৰ্মে তেওঁ ৭ দিনৰ আৰক্ষী জিম্মাত আছিল। জিম্মাত থকা অৱস্থাতে ৰামানুজ গোস্বামীৰ মৃত্যু হয়।
উল্লেখ্য যে ৰিয়া তালুকদাৰৰ আদ্যশ্ৰাদ্ধৰ দিনাই মৃত্যু ঘটে ৰামানুজৰ। গৌৰীপুৰত বোৱাৰীৰ আদ্যশ্ৰাদ্ধ পাতিছিল ৰামানুজৰ পিতৃ-মাতৃয়ে।
Continue Reading
