যাদুৰ দৰে ঘটনা! সাগৰত উটি যোৱা এজন যুৱকক ১৮ ঘণ্টাৰ পাছত জীৱিত অৱস্থাত উদ্ধাৰ

এই সময়ছোৱাত তেওঁৰ প্ৰাণ ৰক্ষা কৰিছিল এটা সৰু ফুটবলে। যিটোক ধৰি থাকি ইভানে নিজৰ জীৱন ৰক্ষা কৰিছিল। অৱশ্যে তেওঁৰ বন্ধুক এতিয়াও বিচাৰি পোৱা নাই। ইভান আৰু তেওঁৰ বন্ধুসকলে গ্ৰীচৰ কেছাণ্ড্ৰা বিচত ফুৰিবলৈ গৈছিল। কেছাণ্ড্ৰা বিচত দুয়োকে এক শক্তিশালী ঢৌৱে উটুৱাই লৈ গ’ল। তেওঁলোকৰ বন্ধুসকলে গ্ৰীচৰ উপকূলৰক্ষী বাহিনীৰ সৈতে যোগাযোগ কৰে কিন্তু কোনেও তেওঁলোকক বিচাৰি উলিয়াব পৰা নাছিল। কোৱা হয় যে যদি ভাগ্য আপোনাৰ লগত থাকে তেন্তে মৃত্যুকো এৰাই চলিব পাৰি। সাগৰত পৰাৰ পাছতেই ক’ৰবাৰ পৰা শিশুৰ ফুটবল এটা উটি আহি তেওঁৰ ওচৰ পাইছিল। ইভানে ফুটবলটো ধৰি সাঁতুৰিবলৈ ধৰিলে। এই সময়ত তেওঁ আশংকা কৰিছিল যে তেওঁ হয়তো কেতিয়াও পৰিত্ৰাণ নাপাব। ইভানক ফুটবল টোৱে সাঁতোৰাত সহায় কৰিছিল।

 

উল্লেখ্য যে এই ফুটবলটো ১০ দিন পূৰ্বে ১১ বছৰীয়া ট্ৰাইফন আৰু ৬ বছৰীয়া থানোছ ভাতৃয়ে খেলি থাকোঁতে হেৰুৱাই পেলাইছিল। গ্ৰীচৰ লেমনোছ দ্বীপৰ এভগেটিছ বিলত খেলি আছিল শিশু দুটাই। এই সময়ছোৱাত হঠাতে এই ফুটবলটো ঢৌৱে উটুৱাই লৈ গৈছিল। ভাগ্য ভাল যে সাগৰৰ ঢৌৱে ফুটবলটোক ৮০ মাইল দূৰত থকা ইভানৰ ওচৰ পোৱালেহি, যাৰ ফলত তেওঁৰ জীৱন ৰক্ষা পৰিল। প্ৰতিৰক্ষা দলে দেখা নোপোৱালৈকে ইভানে সেই ফুটবলটো ধৰি থাকিল। ইভানক গ্ৰীক বায়ুসেনাৰ হেলিকপ্টাৰে দেখা পাই ১৮ ঘণ্টাৰ পিছত পানীৰ পৰা উদ্ধাৰ কৰি আনে। জীৱন ৰক্ষা পৰা বাবে ইভানে ঈশ্বৰক প্ৰাৰ্থনা কৰাৰ লগতে তেওঁৰ বন্ধু যাতে তেওঁৰ দৰেই উদ্ধাৰ হয় তাৰ কামনা কৰিছে।