যিকোনো মুহূৰ্ততে গ্ৰেপ্তাৰ হ’ব পাৰে অভিনেত্ৰী আমিশা পেটেল! কিন্তু কিয়?

 অভিনেত্ৰীগৰাকীক শীঘ্ৰে  ছানী দেওলৰ সৈতে 'গদাৰ ২'ত দেখা যাব। সকলো কথা ঠিকেই চলি আছিল। কিন্তু ইয়াৰ মাজতে আমিশাৰ বিৰুদ্ধে প্ৰৱঞ্চনাৰ অভিযোগ উত্থাপিত হৈছে। অভিনেত্ৰীগৰাকীয়ে প্ৰায় ২.৫ কোটি টকা আত্মসাৎ কৰাৰ গুৰুতৰ অভিযোগ উঠিছে৷ এই  অভিযোগতে তেওঁ  কাৰাগাৰলৈও যাবলগীয়া হ’ব  পাৰে। কেৱল আমিশাই নহয়, ৰাঁচী অসামৰিক আদালতে আমিশাৰ ব্যৱসায়ী বন্ধু ক্ৰুণালৰ বিৰুদ্ধেও গ্ৰেপ্তাৰী পৰোৱানা  জাৰি কৰিছে। 

যোৱা ডেৰ বছৰ ধৰি চলি থকা গোচৰটোত অৱশেষত গ্ৰেপ্তাৰী পৰোৱানা জাৰি কৰা হৈছে । জানিব পৰা মতে  বাৰে বাৰে চমন দিয়া স্বত্বেও আমিশা বা তেওঁৰ উকীলে আদালতত হাজিৰ হোৱা নাছিল। ৰাঁচীৰ অসামৰিক  আদালতে  অভিনেত্ৰীগৰাকীৰ এই আচৰণত অসন্তুষ্ট হৈ পৰে৷ আদালতে গোচৰটোৰ পৰৱৰ্তী শুনানিৰ তাৰিখ ১৫ এপ্ৰিলত নিৰ্ধাৰণ কৰিছে।ৰাঁচীৰ প্ৰযোজক অজয় কুমাৰ সিঙে আমিশাৰ বিৰুদ্ধে ২.৫ কোটি টকাৰ প্ৰৱঞ্চনাৰ গোচৰ ৰুজু কৰিছিল। 

অজয়ে অভিযোগ কৰিছে যে আমিশা আৰু তেওঁৰ ব্যৱসায়িক অংশীদাৰ ক্ৰুণাল গ্ৰুমাৰে 'দেশী মেজিক' নামৰ এখন চলচ্চিত্ৰ কৰিবলৈ অজয়ৰ পৰা ২.৫ কোটি টকা লৈছিল। কিন্তু  ছবিখন তেওঁলোকে নকৰিলে৷আমিশায়ো  তেওঁক টকা ঘূৰাই দিয়া নাই বুলি অভিযোগ কৰা হৈছে। অজয়ে এই সন্দৰ্ভত ৰাঁচী আদালতত গোচৰ ৰুজু কৰিছিল। অজয়ে কয়, "আমিশাই কৈছিল যে ছবিখনে ২০১৮ চনৰ জুন মাহত মুক্তি পাব। যিটো মোৰ বাবে লাভজনক হ'ব। কিন্তু সেয়া নহ'ল। তেওঁলোকে দুমাহৰ পৰা তিনি মাহৰ ভিতৰত সূতৰ সৈতে টকা ঘূৰাই দিয়াৰ প্ৰতিশ্ৰুতি দিছিল।’’ অজয়ে কয়, "তেওঁলোকে ৩ কোটি টকাৰ চেকো দিছিল। কিন্তু সেয়া বাউন্স হয়। তেওঁলোকক এই বিষয়ে কোৱাৰ পিছত তেওঁলোকে আমিশাৰ সৈতে ডাঙৰ মানুহৰ ফটো দেখুৱাই মোক ভাবুকি দিছিল। তেওঁলোকে কৈছিল যে তেওঁলোকে এই বছৰ ছবিখন মুক্তি দিব। কিন্তু মোৰ ওচৰত এতিয়ালৈকে তেনেকুৱা কোনো খবৰ নাই।’’