যোগ গুৰুৰ কীৰ্তি, যোগাসন এৰি অঞ্জলিৰে কি কৰিছে ৰামদেৱে?

নতুন দিল্লীঃ ‘যোগ’ শব্দ‌টি উচ্চাৰণ লগে লগে প্ৰথমে আমাৰ মনলৈ অহা ব্যক্তিগৰাকীয়ে হৈছে বাবা ৰামদেৱ। বিগত কেইবা দশকজুৰি যোগ সেৱাত ব্ৰতী আছে তেওঁ। বিশ্বৰ বিভিন্ন প্ৰান্তলৈ গৈ যোগৰ প্ৰচাৰ আৰু প্ৰসাৰ অব্যাহত ৰাখিছে ৰামদেৱে। এইবাৰ পিছে যোগগুৰুক দেখা গ’ল অন্য ৰূপত। যোগাসনৰ পৰা গৈ ছুপাৰ ডেন্সাৰৰ মঞ্চ পালেগৈ ৰামদেৱে। ছ’নি টিভিত সম্প্ৰচাৰিত অনুষ্ঠানটিৰ এটি ভিডিঅ’ সম্প্ৰতি ভাইৰেল হৈ পৰিছে। ‘দেশ কী ফৰ্মাইছ’ৰ বিশেষ ছেমি ফাইনেল খণ্ডৰ সন্মানীয় অতিথি হিচাপে আমন্ত্ৰণ কৰা হৈছিল বাবা ৰামদেৱক।

অনুষ্ঠানৰ মাজতে ৰামদেৱৰ খুহুটীয়া কথাৰ মেল। সম্প্ৰতি তেনে কিছুমান আকৰ্ষণীয় কথাই পোহৰলৈ আহিছে। ৰামদেৱৰ এটা সৰু কৃতিত্বৰ দ্বাৰা অভিভূত হৈ পৰিছে উপস্থিত দৰ্শক। আনকি ৰামদেৱৰ প্ৰশংসাত পঞ্চমুখ বিচাৰকমণ্ডলী। অনুষ্ঠানটোত উপস্থিত থাকি সকলোকে ইমান আমোদদায়ক মুহূৰ্ত প্ৰদানৰ বাবে বিচাৰক তথা অভিনেত্ৰী শিল্পা ছেট্টীয়েও এটা পোষ্টৰ জৰিয়তে ধন্যবাদসূচক মন্তব্য প্ৰকাশ কৰিছে। শিল্পাই ৰামদেৱৰ সৈতে সামাজিক মাধ্যমত এখন ফটো শ্বেয়াৰ কৰি কয়, ‘অঞ্জলি উইথ দা ফ্রেমড পতঞ্জলি।’ শিল্পাৰ টুইটৰ পাছতে ভাইৰেল হৈ পৰিছে যোগগুৰুৰ কীৰ্তি।