ডিজিটেল ডেস্কঃপ্ৰেমে নামানে কোনো বাধা৷ ৰাছিয়াৰ চিৰ শত্ৰ দেশ ইউক্ৰেইনৰ প্ৰেমিকাক চিৰলগৰী হিচাবে পাবলৈ ব্যাকুল হৈ আছিল ৰাছিয়াৰ এজন প্ৰেমিক৷ কিন্তু ইউক্ৰেইনৰ যুৱতীক নিজৰ দেশতে বিয়া পাতিলে ৰাছিয়াৰ প্ৰেমিক পুটিন প্ৰশাসনৰ ৰোষত পৰাৰ আশংকাই বেছি৷ সেয়ে প্ৰেমৰ বোৱতী নৈত উটি ভাঁহি আহি দুখন বৈৰী দেশৰ প্ৰেমিক প্ৰেমিকাই আহি পালেহি ভাৰত৷
প্ৰেমে সকলো সীমা অতিক্ৰম কৰে সেই কথাকেই প্ৰমাণ কৰি ভাৰতৰ হিমাচল প্ৰদেশৰ ধৰ্মশালাত ৰাছিয়াৰ প্ৰেমিক ছেৰ্গেই নভিকভে ইউক্ৰেনৰ প্ৰেমিকা ইলোনা ব্ৰামোকাক হিমাচল প্ৰদেশৰ দিব্যা আশ্ৰম খাৰোটাত আজি বিয়া কৰায়৷
সেৰ্গেই নভিকভ আৰু ইলোনা ব্ৰামোকাই দুবছৰ ধৰি সম্পৰ্ক ৰক্ষা কৰি আহিছিল৷ ৰাছিয়া আৰু ইউক্ৰেইনৰ মাজত বৰ্তমানযুদ্ধ চলি থকা বাবেই তেোঁলোকে ধৰ্মশালাত বিবাহপাশত আৱদ্ধ হোৱাৰ সিদ্ধান্ত লয়।
সেইমৰ্মে তেওঁলোকে সনাতন ধৰ্মৰ ৰীতি-নীতি অনুসৰি বিবাহপাশত আৱদ্ধ হয়। বিবাহ অনুষ্ঠানটোত উপস্থিত থকা স্থানীয় লোকসকলে সকলো ৰীতি-নীতি পালন কৰি তেওঁলোকৰ যুগ্ম জীৱনৰ পথ প্ৰশস্ত কৰি দিয়ে৷
উপস্থিত লোকসকলে পৰম্পৰাগত হিমাচলী লোকগীতত নৃত্যও কৰিছিল।
অতিথিসকলক কাংৰি ধামত আপ্যায়নো কৰা হয় । দিব্যা আশ্ৰম খাৰোটাৰ পণ্ডিত সন্দীপ শৰ্মাৰ মতে, সেৰ্গেই আৰু ইলোনাই যোৱা এবছৰ ধৰি ধৰ্মশালাৰ ওচৰৰ ধৰ্মকোটত আছিল।
যুদ্ধই বিধ্বস্ত কৰা ইউক্ৰেইনৰ যুৱতীগৰাকীৰ পৰিয়ালৰ বিশেষ কোনো লোক অৱশ্যে যুদ্ধৰ বাবেই বিবাহ অনুষ্ঠানত উপস্থিত থাকিব নোৱাৰিলে৷
Continue Reading
