যুদ্ধৰ বিভীষিকাৰ মাজতে ইউক্ৰেইনত জীৱনৰ অংকুৰণ; আশাৰ প্ৰতীক হৈ ওপজিল ‘মিয়া’

ডিজিটেল ডেস্ক : ৰাছিয়াৰ আক্ৰমণত বিধ্বস্ত ইউক্ৰেইন। ৰাছিয়ান সৈন্যই প্ৰৱল আগ্ৰাসী ৰূপেৰে বিচৰণ কৰিছে ইউক্ৰেইনৰ ৰাজপথ৷ একপ্ৰকাৰে ভয় আৰু বিভীষিকাৰ মাজেৰে দিন কটাইছে ইউক্ৰেইনৰ বাসিন্দাসকলে৷ কিন্তু এই বিভীষিকাৰ মাজতে শ্বেয়াৰ হোৱা এখন ছবিয়ে মুখত হাঁহি বিৰিঙাই তুলিছে ইউক্ৰেইনৰ লোকসকলৰ। তাৰ কাৰণ হৈছে এটি দেৱশিশু৷ যুদ্ধৰ বিভীষিকাৰ পৰা বাছিবলৈ কিয়েভ মেট্ৰ' ষ্টেচনৰ ছাবৱেত আশ্ৰয় লৈ থকা অৱস্থাতে এগৰাকী মহিলাই জন্ম দিয়ে এগৰাকী কন্যাৰ। ঘটনাটো বৰ্ণনা কৰি দেশখনৰ এজন আৰক্ষী বিষয়াই এটা টুইট কৰিছিল। এই দেৱশিশুটি দেখি সকলোৱে আশীৰ্বাদ দিছিল আৰু দিছিল শুভেচ্ছা বাৰ্তা। তেওঁলোকৰ বহুতে কয় যে এই বিপদৰ মাজত ক’ৰবাত সকাহ দেখিবলৈ পাইছোঁ। নৱজাতকটি জন্মৰ বাবে চাৰিওফালে আশাৰ এক ৰেঙণি দেখিছোঁ বুলি বহুজনে মত পোষণ কৰিছে। আকৌ বহুজনে নৱজাতকটিক শান্তিৰ প্ৰতীক হিচাপেও গণ্য কৰিছে৷ এজন আৰক্ষী বিষয়াই কয় যে প্ৰসৱ বেদনাত মহিলাগৰাকী কিয়েভ মেট্ৰ' ষ্টেচনত ছটফটাই আছিল৷ চিকিৎসালয় কিম্বা নাৰ্ছিং হোমতো দূৰৈৰে কথা এগৰাকী চিকিৎসকক পাবলৈও বহু কঠিন হৈছিল সেই সময়ত৷ যাৰফলত আৰক্ষীয়ে সহায় কৰে প্ৰসৱ বেদনাত ছটফটাই থকা মহিলাগৰাকীক। অৱশেষত নিশা ৮:৩০ বজাত মহিলাগৰাকীয়ে প্ৰসৱ কৰে এটি কন্যা সন্তান। আৰু শিশুটিক মিয়া নামেৰে কৰা হয় নামকৰণ। পাছত মাতৃ আৰু শিশুটিক এখন এম্বুলেন্সেৰে চিকিৎসালয়লৈ লৈ যোৱা হৈছিল। দুয়োজন বৰ্তমান সুস্থ।