যুযুধান : ওৰেৰাতি মুখ্যমন্ত্ৰীৰ ঘৰৰ সন্মুখত প্ৰতিবাদ কৰিব সহস্ৰাধিকে, কি হ’ব পৰিস্থিতি?

ডিজিটেল ডেস্ক : যুযুধান। কৃষি আইনবিৰোধী প্ৰতিবাদত সামান্যতমো শিথিল হ’বলৈ নিদিয়াৰ যেন পণ লৈছে দেশৰ কৃষকে। হাৰিয়ানা চৰকাৰৰ বিৰুদ্ধে এইবাৰ উঠি-পৰি লাগিছে বিদ্ৰোহী কৃষকসকল। শুকুৰবাৰে উপ-মুখ্যমন্ত্ৰী দুষ্যন্ত চৌতালাৰ সভাৰ সময়ত তীব্ৰ প্ৰতিবাদী কাৰ্যসূচী গ্ৰহণৰ পাছত শনিবাৰৰ দিনটোত মুখ্যমন্ত্ৰীৰ ঘৰ একপ্ৰকাৰ ঘেৰাও কৰাৰ বাবে অগ্ৰসৰ হ’ল প্ৰতিবাদী সহস্ৰাধিক কৃষকে। শনিবাৰে পুৱাৰ ভাগতে মুখ্যমন্ত্ৰী মনোহৰ লাল খট্টৰৰ বাসগৃহৰ সমীপত সমবেত হৈ কৃষকসকলে তীব্ৰ প্ৰতিবাদ সাব্যস্ত কৰে।

ওৰে নিশা প্ৰতিবাদৰ লক্ষ্যৰে মুখ্যমন্ত্ৰী খট্টৰৰ বাসগৃহৰ সমীপত সমবেত হৈছে প্ৰতিবাদী কৃষকসকল। ইফালে প্ৰতিবাদী কৃষকক বাধা দিয়াৰ বাবে আৰক্ষী আৰু নিৰাপত্তাবাহিনীৰে ভৰি পৰিছে মুখ্যমন্ত্ৰীৰ ঘৰৰ চৌপাশ। বেৰিকেড নিৰ্মাণ কৰি আৰক্ষীয়ে বাধা দিয়াৰ চেষ্টা কৰিছে প্ৰতিবাদকাৰীক। প্ৰতিবাদী কৃষকসকলৰ ওপৰত আৰক্ষীয়ে পানীহিলৈও নিক্ষেপ কৰিছে। এটা সপ্তাহৰ ভিতৰতে হাৰিয়ানাত কেইবাবাৰো আৰক্ষীৰে সংঘৰ্ষত লিপ্ত হৈছে প্ৰতিবাদী কৃষকসকল। আজিও প্ৰতিবাদস্থলীত কন্দুৱা গেছ, পানী হিলৈ সাজু কৰি ৰাখিছে আৰক্ষীয়ে। কেৱল মুখ্যমন্ত্ৰীৰ বাসগৃহৰ সন্মুখতে নহয়, শাসকীয় বিজেপি আৰু জেজেপিৰ বিধায়কৰ আবাসৰ সন্মুখতো প্ৰতিবাদৰ বাবে একত্ৰিত হৈছে বিক্ষুব্ধ কৃষকসকল। কৃষকৰ এনে যুযুধান ৰূপে পৰিস্থিতি জটিল কৰি তোৱাৰ ইংগিত দিছে।