এদিন প্ৰত্যাখ্যান কৰিছিল বলীউডে; এতিয়া তেওঁ নিজেই এটা ছেনছেচন! ‘ধিন্দোৰা’ৰে ভূৱন বামৰ আলোড়ন

মুম্বাই : সপোনৰ পাছত দৌৰা এজন যুৱক৷ বলীউডত প্ৰতিষ্ঠা লাভৰ সপোন দেখা এদিন তেওঁক প্রত্যাখ্যান কৰা হৈছিল। আঁতৰাই পঠিওৱা হৈছিল তেওঁক মায়ানগৰীৰ পৰা। সেই প্ৰতিভাক বলীউডৰ জগতত খোপনি পোতাৰ সুবিধাই নিদিলে একাংশই৷ কিন্তু সেইজন যুৱকেই আজি নিজ চেষ্টা আৰু প্ৰতিভাৰ বলত এক সুকীয়া পৰিচয়েৰে উজলি উঠিছে৷ তেওঁ ভূৱন বাম। এতিয়া ছ'চিয়েল মিডিয়াৰ এক শিহৰণস্বৰূপ তেওঁ। তেওঁৰ প্ৰতিটো ভিডিঅ’ উপভোগ কৰে লক্ষ লক্ষ লোকে৷ বলীউডৰ পৰা বিফল মনোৰথেৰে উভতি অহা ভূৱন বামে ইউটিউবত ২০ নিযুত ছাবস্ক্ৰাইবাৰেৰে এতিয়া অৰ্জন কৰিছে অনন্য খ্যাতি৷ ভূৱন বাম ২০ মিলিয়ন ছাবস্ক্ৰাইবাৰ লাভ কৰা ভাৰতৰ প্ৰথমজন ইউটিউবাৰ হিচাপে পৰিগণিত হৈছে৷ তেওঁ ভাৰতৰ তৃতীয় সৰ্বাধিক উপাৰ্জনকাৰী ইউটিউবাৰ হিচাপেও পৰিগণিত হৈছে। যাৰ সম্পত্তিৰ পৰিমাণ প্ৰায় ৩ নিযুত মাৰ্কিন ডলাৰ।

তদুপৰি ইনষ্টাগ্ৰাম একাউন্টতো ১২মিলিয়ন ফল'ৱাৰ্ছ আছে ভূৱনৰ৷ যুৱ প্ৰজন্মৰ বহু লোকৰ বাবে এতিয়া অনুপ্ৰেৰণাৰ এক উৎস হৈ পৰা ভূৱনে এই সফল যাত্ৰাৰ সন্দৰ্ভত কয়, ‘সদায় নিজৰ অন্তৰৰ কথা শুনিবা৷ মই এতিয়াও এজন ভাল মানুহৰ পৰা শিকিবলৈ চেষ্টা কৰোঁ৷ এটা ডিগ্ৰী লোৱা আৰু জীৱনৰ লক্ষ্যৰ পাছত দৌৰা৷’ সম্প্ৰতি ভূৱন বামৰ এটা ছিৰিজে ব্যাপক সমাদৰ লাভ কৰাৰ লগে লগে তেওঁ পুনৰ চৰ্চালৈ আহিছে। ইউটিউবত ভূৱনৰ 'ধিন্দোৰা' ৱেব ছিৰিজে বিশেষভাৱে সফলতাৰ মুখ দেখিছে৷ ছিৰিজটো মুকলিৰ ২৪ ঘন্টাৰ ভিতৰতে ১ কোটি মানুহে উপভোগ কৰিছে৷ 'ধিন্দোৰা'ৰ দুয়োটা খণ্ডই ইতিমধ্যে প্ৰায় ৪ কোটি দৰ্শকে উপভোগ কৰিছে৷

১৯৯৪চনৰ গুজৰাটত জন্ম লাভ কৰা ইউটিউবাৰ ভূৱন এজনক সু-গায়ক হোৱাৰ উপৰি কমেডিয়ান আৰু লেখকো৷ ২০১৫ চনত ভূৱনে কাশ্মীৰৰ বানৰ সময়ত কৰা এটা ভিডিঅ' ছ'চিয়েল মিডিয়াত ভাইৰেল হোৱাৰ পাছৰে পৰা ইউটিউবৰ যাত্ৰা আৰম্ভ কৰিছিল৷ এই সফলতাৰ যাত্ৰাত ভূবনে এই বৰ্ষত মুখামুখি হ’বলগীয়া হ’ল এক কৰুণ প্ৰত্যাহ্বানৰ৷ ভূৱনৰ পিতৃ-মাতৃয়ে এই বছৰ একেলগে প্ৰাণ হেৰুৱায় ক'ভিড ১৯ত আক্ৰান্ত হৈ৷ তথাপি থমকি ৰোৱা নাই ভূৱন। প্ৰতিদিনে সফলতাৰ নিত্য-নতুন ইতিহাস ৰচনা কৰি আগবাঢ়ি গৈছে এদিন বলীউডে প্ৰত্যাখ্যান কৰা ভূৱন বাম।