ঘৰত নবহে মন!প্ৰেমিকক লগ পাবলৈ কাঁইটীয়া তাঁৰ পাৰ হৈ ভাৰতত সোমাল প্ৰেমিকা, তাৰপাছত?

ডিজিটেল ডেস্কঃ প্ৰেমৰ বাবে বহু মানুহে অসাধ্য সাধন কৰে। প্ৰেম এনেকুৱা এক শক্তি যে মানুহে যিকোনো বাধা ওফৰাই দিবলৈ সাজু হৈ উঠে। এগৰাকী প্ৰেমিকাই দুখন দেশৰ মাজৰ কাঁইটীয়া বেৰ পাৰ হৈ নিজৰ প্ৰেমিকক লগ পাবলৈ ঢপলিয়াই গ'ল। প্ৰেমে যে কোনো বাধা নামানে তাকেই যেন প্ৰমাণ কৰি দেখুৱালে প্ৰেমিকাগৰাকীয়ে। ভাৰতৰ কোচবিহাৰৰ তুফানগঞ্জৰ এজন যুৱকৰ প্ৰেমত পৰিছিল বাংলাদেশৰ এগৰাকী যুৱতী। প্ৰায় ছমাহ পূৰ্বে ছ’চিয়েল মিডিয়াযোগে দুয়োৰে মাজত চিনাকি হয় আৰু লাহে তেওঁলোকৰ মাজত বন্ধুত্বই গঢ় লৈ উঠে। এই বন্ধুত্বই কেতিয়ানো প্ৰেমৰ ৰূপ ললে দুয়ো তলকিবই নোৱাৰিলে। প্ৰেমিকক লগ পাবলৈ উত্ৰাৱল হৈ পৰিল প্ৰেমিকা। প্ৰেমৰ তাড়নাত অৱশেষত বাংলাদেশৰ বগুড়া জিলাৰ পৰা দুই দেশৰ মাজৰ বিশাল কাঁইটীয়া বেৰ অবৈধভাৱে পাৰ হৈ ভাৰতত প্ৰৱেশ কৰে প্ৰেমিকাই। প্ৰেমিকাৰ নাম আৱছানা। ভাৰতত অবৈধভাৱে প্ৰৱেশ কৰা আৱছানাক বাংলাদেশ সীমান্তৰ দিঘলচাৰীত সীমা সুৰক্ষা বাহিনীৰ ১২৯ নং বাহিনীয়ে আটক কৰে। সীমান্ত সুৰক্ষা বাহিনীয়ে আৱছানাক পিছত সাহেৱগঞ্জ আৰক্ষীক গতাই দিয়ে। বংগ আৰক্ষীয়ে সোমবাৰে আৱছানাক দিনহাটা মহকুমা স্বাস্থ্য কেন্দ্ৰত স্বাস্থ্য পৰীক্ষা কৰি দিনহাটা মহকুমা আদালতত হাজিৰ কৰোৱায়। আদালতে প্ৰেমিকাগৰাকীক চৈধ্য দিনৰ বাবে জেল হাজোতলৈ প্ৰেৰণ কৰিছে। অৱশ্যে আৱছানাৰ ভাৰতীয় প্ৰেমিকৰ এতিয়াও কোনো সন্ধান ওলোৱা নাই। বাংলাদেশী প্ৰেয়সীয়ে যুৱকজনৰ ঘৰ তুফানগঞ্জত বুলি দাবী কৰিলেও এতিয়াও পোহৰলৈ অহা নাই প্ৰেমিকৰ নাম-পৰিচয়। কিন্তু দুখন দেশৰ এই প্ৰেম কাহিনীয়ে এতিয়া সকলোতে লভিছে চৰ্চা। আগ পিছ নুগুনি প্ৰেমিকক লগ কৰিবলৈ অহা প্ৰেমিকাৰ লটিঘটিৰ কাহিনীয়ে বহু লোকক আমোদো দিছে। আৰু পঢ়কঃ ২টা মূৰ ৪ টা চকুৰে জন্ম হ’ল গৰু পোৱালিৰ! পোৱালিটো চাবলৈ ভিৰ লাগিছে মানুহৰ