বিহাৰত ২১ হাজাৰ কোটি টকাৰ খনিজ সম্পদ আৱিষ্কাৰ ‘জি এছ আই’ৰ

ডিজিটেল ডেস্ক: বিহাৰত প্ৰায় ২১,০০০ কোটি টকাৰ খনিজ সম্পদ আৱিষ্কাৰ কৰা হৈছে। ভাৰতৰ ভূতাত্ত্বিক জৰীপ বিভাগ চমুকৈ 'জি এছ আই'ৰ অধীনত চলোৱা শেহতীয়া জৰীপত বিহাৰত ক্ৰমাইট, নিকেল, প্লেটিনাম মৌল, লৌহ আকৰ (মেগনেটাইট) আৰু চূণশিলৰ দৰে গুৰুত্বপূৰ্ণ খনিজ সম্পদ আৱিষ্কাৰ হৈছে।

আনহাতে, শক্তি পৰিৱৰ্তন দিশত বিহাৰৰ মাইকা বেল্টত লিথিয়াম, চিজিয়াম আৰু ৰুবিডিয়ামৰ দৰে বিৰল খনিজৰ সন্ধান পোৱা গৈছে। বিহাৰে ইয়াৰ খনিজ অর্থনীতিক পুনৰ গঢ় দিব বিচাৰিছে। ২০২১ আৰু ২০২৪ চনৰ ভিতৰত ৰাজ্যখনৰ ৰোহতাছ, জামুই আৰু গয়াত চলোৱা ভূতাত্ত্বিক অন্বেষণত প্রায় ২১ হাজাৰ কোটি টকাৰ বিৰল খনিজৰ সন্ধান পোৱা গৈছে। 

ৰোহতাছত ভাৰতৰ সৰ্ববৃহৎ পাইৰাইট ভাণ্ডাৰ আছে। আনহাতে, জামুই জিলাত ভাৰতৰ সৰ্ববৃহৎ সোণৰ ভাণ্ডাৰ থকা বুলি প্রমাণিত হৈছে। জামুইত ২২২.৮৮ নিযুত টন স্বর্ণযুক্ত আকৰ আছে। এই আৱিষ্কাৰবোৰক খনিলৈ ৰূপান্তৰ কৰাৰ কৌশল হিচাপে বিহাৰ চৰকাৰে এই ভূ-বৈজ্ঞানিক অন্বেষণসমূহক ২০২৬-২০৩১ বৰ্ষৰ ভিতৰত বাণিজ্যিকভাৱে উৎপাদন কৰাৰ লক্ষ্য নির্ধাৰণ কৰিছে। 

সংশোধিত খনি-খনিজ উন্নয়ন নিয়ন্ত্রণ (এম এম ডি আৰ) আইনৰ অধীনত বিহাৰে নিজৰ আইনী আৰু প্ৰশাসনিক গাঁথনিক ওড়িশা আৰু ঝাৰখণ্ডৰ দৰে খনিজ সমৃদ্ধ ৰাজ্যসমূহৰ দৰে সমকক্ষ কৰি তুলিছে। কেন্দ্রীয় খনি মন্ত্ৰালয়ৰ সহযোগত বিহাৰে ইতিমধ্যে গয়া, জামুই আৰু ৰোহতাছত খনিজ সম্পদবোৰৰ নিলাম প্ৰক্ৰিয়া আৰম্ভ কৰিছে।

উৎস: দৈনিক জনমভূমি