জলবায়ু সন্মিলনত নাচে-গানে উজলি উঠিল কোন তৰুণী? বিশ্বজুৰি ভাইৰেল ভিডিঅ’

ডিজিটেল ডেস্ক : ৰাষ্ট্ৰসংঘৰ মজিয়াত বিশ্বৰ শীৰ্ষনেতাসকলৰ চকুত চকু থৈ তেওঁ এদিন গৰজি উঠিছিল। প্ৰশ্ন কৰিছিল, মোৰ দৰে অসংখ্যজনৰ সপোন চুৰমাৰ কৰিবলৈ আপোনালোকৰ সাহস হ’ল কেনেকৈ? কিয় মই স্কুল এৰি ইয়ালৈ আহিবলগীয়া হৈছে? সাৰশূন্য কথা-বতৰাৰ মাজত আপোনালোকে কিয় আমাৰ ভৱিষ্যৎ ধ্বংস কৰিব খুজিছে! আপোনালোকৰ ইমান সাহস! স্কুলৰ শ্ৰেণীকোঠা এৰি আহি পৰিৱেশ ৰক্ষাৰ বাবে তেওঁৰ অনমনীয় সংগ্ৰামৰ বাবেই পৰিচিত হৈ আহিছে এইগৰাকী তৰুণী। গ্ৰেটা থুনবাৰ্গ।

আৰু পঢ়কঃ ৰাজপথ হ’লগৈ ৰণাংগন; ধৰ্মীয় সমদলৰ মাজতে কেনেকৈ ঘটিল এই অঘটন?

পিছে এইবাৰ এক ব্যতিক্ৰমী ৰূপত দেখা গ’ল তৰুণী পৰিৱেশকৰ্মী গ্ৰেটা থুনবাৰ্গক। ষ্টকহ’মত অনুষ্ঠিত এক জলবায়ু সম্বন্ধীয় কনচাৰ্টত নাচি, গান গাই দৰ্শকক মোহিত কৰিলে ছুইডেনৰ ১৮ বছৰীয়া গ্ৰেটাই। কনচাৰ্টত উপস্থিত থকা যুৱসমাজৰ সন্মুখত গোলকীয় উষ্ণতাৰ ভয়াৱহতাৰ বিষয়ে অৱগত কৰাৰ লগতে ব্ৰিটিছ গায়ক ৰিক এছলেৰ সৈতে সমানে সমানে ডান্স কৰিলে ৰূপহী তৰুণী থুনবাৰ্গে।

অকল নৃত্য কৰাই নহয়, ৰিকৰ সৈতে গীতো গালে বিশ্বৰ জনপ্ৰিয় যুৱতীগৰাকীয়ে। ৰিক এছলেৰ গীত ‘নেভাৰ গনা গিভ আপ’ গীতৰ সুৰে সুৰে গ্ৰেটা থুনবাৰ্গে সুৰ মিলোৱাৰ লগতে আপোন পাহৰা হৈ নাচিলেও এই দুৰন্ত তৰুণীয়ে। জলবায়ু সন্মিলনৰ এই দৃশ্য এতিয়া ছ’চিয়েল মিডিয়াত ভাইৰেল হৈ পৰিছে।