কংগনা ঘৃণাৰ কাৰখানা,মানসিক চিকিৎসালয় বা কাৰাগাৰেই হওক পৰিচয়ঃকোনে কৰিলে এই মন্তব্য?

নতুন দিল্লীঃ বলীউডৰ বহুচৰ্চিত অভিনেত্ৰী কংগনা ৰাণাৱটে বিস্ফোৰক মন্তব্য কৰাৰ পৰা আঁতৰি থকা নাই। এগৰাকী অভিনেত্ৰী হিচাপে অভিনয়ৰ সৈতে দীৰ্ঘদিন ধৰি ৰূপালী পৰ্দাৰ পৰা আঁতৰি থাকিলেও বিতৰ্কিত মন্তব্যৰে প্ৰায়ে সংবাদ শিৰোনামা দখল কৰিছে কংগনাই। ভাৰতবৰ্ষৰ স্বাধীনতা, জাতিৰ পিতা মহাত্মা গান্ধীক লৈ বিতৰ্কিত মন্তব্য কৰাৰ পাছত এইবাৰ শিখ সম্প্ৰদায়ৰ বিৰুদ্ধে কংগনাই কৰিছে বিৰূপ মন্তব্য। ইনষ্টাগ্ৰামত শিখ সম্প্ৰদায়ৰ বিৰুদ্ধে অপমানজনক মন্তব্য কৰাৰ অভিযোগ উত্থাপিত হৈছে কংগনাৰ বিৰুদ্ধে। আৰক্ষী চকীত অভিযোগো দাখিল কৰিছে দিল্লী শিখ গুৰুদ্বাৰ পৰিচালনা সমিতিয়ে। মন্দিৰ মাৰ্গ আৰক্ষী থানাৰ চাইবাৰ চেলত এই অভিযোগতো দাখিল কৰা হৈছে বুলি জানিবলৈ পোৱা গৈছে।অভিযোগ মতে, অভিনেত্ৰীগৰাকীয়ে শিখ সম্প্ৰদায়ৰ বিৰুদ্ধে অপমানজনক ভাষা ব্যৱহাৰ কৰিছিল আৰু পোষ্টটো আছিল উদ্দেশ্যপ্ৰণোদিত।

শিখ সম্প্ৰদায়ৰ অনুভূতিক আঘাত কৰাৰ এই অভিপ্ৰায় অক্ষমণীয় বুলিও মন্তব্য কৰিছে দিল্লী শিখ গুৰুদ্বাৰ পৰিচালনা সমিতিয়ে। এক বিবৃতিত প্ৰকাশ পোৱা মতে, ‘শিখ সম্প্ৰদায়ক কংগনাই খলিস্তানি সন্ত্ৰাসবাদী বুলি অভিহিত কৰিছে। দেশৰ প্ৰাক্তন প্ৰধানমন্ত্ৰী ইন্দিৰা গান্ধীৰ শাসনকালত সংঘটিত ১৯৮৪ চনৰ গণহত্যাকো এক পৰিকল্পিত পদক্ষেপ বুলি বৰ্ণনা কৰিছে কংগনাই। কংগনা ৰ মন্তব্যই তিক্ত বিতৰ্কৰ সৃষ্টি কৰাৰ সময়তে শিৰোনী অকালি দলৰ নেতা তথা দিল্লী শিখ গুৰুদ্বাৰা পৰিচালনা সমিতিৰ অধ্যক্ষ মনজিন্দৰ সিং চিৰছাই কংগনাৰ বিৰুদ্ধে হৈ পৰিছে সৰব।কংগনাক কাৰাগাৰ বা মানসিক চিকিৎসালয়ত ৰখা উচিত বুলিও মন্তব্য কৰিছে মনজিন্দৰ সিঙে। তেওঁ লগতে কয়, ‘কংগনাৰ মন্তব্যই তেওঁৰ সস্তীয়া মানসিকতাৰ কথাকে সূচাইছে। খলিস্তানী সন্ত্ৰাসবাদীৰ কাৰণে তিনিখন কৃষি আইন বাতিল কৰা হৈছে বুলি কোৱাটো কৃষকসকলৰ বাবে অপমানজনক। তেওঁ প্ৰকৃততে এটা ঘৃণাৰ কাৰখানা। কংগনাৰ বিৰুদ্ধে চৰকাৰে কঠোৰ ব্যৱস্থা গ্ৰহণ কৰাটো আমাৰ দাবী। তেওঁৰ নিৰাপত্তা আৰু ‘পদ্মশ্ৰী’ সন্মানো তৎক্ষণাৎ প্ৰত্যাহাৰ কৰিব লাগিব। তেওঁক মানসিক চিকিৎসালয় বা কাৰাগাৰত ৰাখিব লাগে।’