কোনে একাষৰীয়া কৰিলে কেটৰিনা-প্ৰিয়ংকাক? বিদায়ৰ দুৱাৰডলিত কোন শ্ৰেষ্ঠ?

নতুন দিল্লীঃ বিদায়ৰ দুৱাৰডলিত আৰু এটা বছৰ। বছৰটোৰ বিদায়ৰ প্ৰাকমুহূৰ্তত বিভিন্ন ক্ষেত্ৰৰ সফলতা-বিফলতা,প্ৰাপ্তি-অপ্ৰাপ্তিক লৈ কাউণ্টডাউন ইতিমধ্যে আৰম্ভ হৈ গৈছে। সম্প্ৰতি, বলীউড অভিনেত্ৰী কৰীণা কাপুৰ খানক লৈ হৈছে চৰ্চা। কৰীণাই কি কৰি আছে, তেওঁ ক'লৈ গৈছে, তেওঁ কি পিন্ধিছে সেই বিষয়ে যেন আৰম্ভ হৈছে এক অন্তহীন আলোচনাৰ। শেহতীয়াকৈ প্ৰকাশ পোৱা ‘ইয়াহু’ৰ তালিকাতো কৰীণাৰে নাম। বছৰটোৰ শেষত, অনুৰাগীয়ে সৰ্বাধিক বিচৰা নায়িকাৰ তালিকাত কৰীণাৰ নাম প্ৰকাশ পাইছে। উল্লেখ্য যে, চলিত বৰ্ষৰ ফেব্ৰুৱাৰীত দ্বিতীয় সন্তানৰ মাতৃ হৈছিল কৰীণা।

তেতিয়াৰ পৰাই নৱাব পৰিয়ালৰ নতুন সদস্যক লৈ অনুৰাগীসকলৰ মাজত অন্তহীন কৌতূহলে বিৰাজ কৰা দেখিবলৈ পোৱা গৈছে। মাতৃত্বৰ গৌৰৱ অৰ্জনৰ লগতে কাপুৰ-কন্যাই এখন গ্ৰন্থও প্ৰকাশ কৰি উলিয়াইছিল। যাৰ বাবে দীৰ্ঘদিন ধৰি বাতৰিৰ শিৰোনামত আছিল ছেইফ পত্নী কৰীণা কাপুৰ। ইফালে ‘ইয়াহু’ৰ তালিকাখনৰ দ্বিতীয় স্থানত আছে কেটৰিনা কাঈফ। তেওঁৰ বহু প্ৰতীক্ষিত চলচ্চিত্ৰ 'সূৰ্যবংশী'য়ে চলিত বৰ্ষতে মুক্তি লাভ কৰিছে। প্ৰায় এক দশকৰ বিৰতিৰ পাছত পুনৰ অক্ষয় কুমাৰৰ সৈতে অভিনয় কৰিছে কেটৰিনাই। বিকি কৌশলৰ সৈতে কেটৰিনাৰ বিবাহৰ গুঞ্জন এতিয়া বলীউডত সবাটোকৈ চৰ্চাৰ বিষয় হৈ পৰিছে। কৰীণা,কেটৰিনাৰ পাছতে তালিকাৰ তৃতীয় স্থানত আছে প্ৰিয়ংকা চোপ্ৰা। চতুৰ্থ স্থানত আছে আলিয়া ভাট। একাধিক বিগ বাজেটৰ চলচ্চিত্ৰ উপহাৰ দিয়া বাবে আৰু ৰণবীৰৰে থকা অফুৰন্ত প্ৰেমৰ বাবে ওৰেটো বছৰ বাতৰিৰ শিৰোনাম দখল কৰিছে প্ৰিয়ংকাই।