নৱবৰ্ষ উদযাপন নকৰিব! সতৰ্কবাণী লিখি ঠায়ে ঠায়ে লগাইছে পোষ্টাৰ

ডিজিটেল ডেস্কঃ আহি আছে নৱবৰ্ষ ২০২২। মাথোঁ কেইঘণ্টা মানৰ পাছতেই এটা নতুন বছৰ বিশ্ববাসীয়ে আঁকোৱালি ল'ব। নতুন বছৰটিক আদৰাৰ প্ৰস্তুতিত ব্যস্ত সকলো। কোনোৱে কৰিব পাৰ্টি, কোনো যাব ফুৰিবলৈ মুঠৰ ওপৰত চৌদিশে এতিয়া এক আনন্দময় পৰিৱেশ। ইয়াৰ মাজতে এখন ঠাইত নৱবৰ্ষ উদযাপন নকৰিবলৈ দিয়া হৈছে সতৰ্কবাণী। বাৰাণসীত নৱবৰ্ষ উদযাপন নকৰিবলৈ সতৰ্কবাণী দিয়া হৈছে। এই সতৰ্কবাণী দিছে বজৰং দলে। বজৰং দলে কৈছে যে নৱবৰ্ষ উদযাপন কৰাটো আমাৰ চিৰন্তন পৰম্পৰাৰ বিৰোধী। গতিকে কোনোৱে যাতে নৱবৰ্ষ উদযাপন নকৰে। বজৰং দলে বাৰাণসীৰ সকলো মল আৰু ৰেষ্টুৰেণ্টৰ বাহিৰত সতৰ্কবাণী লিখি পোষ্টাৰ আঁৰি দিছে।

বাৰাণসীৰ সকলো মল, ৰেষ্টুৰেণ্ট আৰু হোটেলৰ বাহিৰত সতৰ্কবাণী পত্ৰ লগোৱা আৰম্ভ কৰিছে বজৰং দলৰ কৰ্মীসকলে। বজৰং দলৰ কাশী মহানগৰীয় আহ্বায়ক 'ৰুদ্ৰ'ৰ নামত মুকলি কৰা পোষ্টাৰসমূহে স্পষ্টকৈ কয় যে ''কাশী নগৰী হিন্দু বিশ্বাস আৰু সাংস্কৃতিক পৰম্পৰাৰ কেন্দ্ৰ। ইয়াক বিশ্বত ভাৰতৰ সাংস্কৃতিক ৰাজধানী বুলিও জনা যায়। পৃথিৱীৰ মানুহে ইয়ালৈ ধৰ্ম, জ্ঞান, আধ্যাত্মিকতা আৰু জীৱনৰ বিচাৰ ল'বৰ বাবে আহে। কাশীৰ গুৰুত্বপূৰ্ণ পৰিচয় হৈছে এই চহৰখনৰ প্ৰাচীনতা আৰু আধ্যাত্মিকতা কিন্তু কিছুমান ব্যৱসায়িক প্ৰতিষ্ঠান, শ্বপিং মল, ক্লাবে পাশ্চাত্য সংস্কৃতিক অনুকৰণ কৰি নতুন বছৰ আদৰাৰ নামত মতলীয়া হৈ কাশীৰ সন্মান লাঘৱ কৰে। গতিকে এইবাৰ যাতে নতুন বছৰ আদৰাৰ নামত কোনো আয়োজন নহয় সেই কথা আমি সকীয়াই দিলোঁ। নৱবৰ্ষ উদযাপনৰ নামত সুৰা পাৰ্টি আদিৰ জৰিয়তে যুৱক-যুৱতীৰ সামাজিক অৱনতি ঘটিছে। গতিকে আমি এই কাৰ্যৰ তীব্ৰ বিৰোধিতা কৰিছোঁ।''

অৱশ্যে বজৰং দলে জাৰি কৰা এই বিষয়টোত আৰক্ষী প্ৰশাসনৰ পৰা এতিয়ালৈকে কোনো সঁহাৰি পোৱা নাই। জনসাধাৰণে বজৰং দলৰ এই সতৰ্কবাণীৰ প্ৰতি কেনে সঁহাৰি দিয়ে সেয়া নিশ্চয়কৈ হ'ব লক্ষ্যণীয়।

আৰু পঢ়কঃ এয়াই সেই কিম জং উন হয়নে? ক্ষীণ চেহেৰাৰ কিমৰ ফটোৱে বিশ্বত তুলিছে খলকনি!