পশ্চিমবংগত প্ৰাক্তন বাছ চালকৰ ঘৰত চলিল অভিযান; উদ্ধাৰ প্ৰায় ২৯ কোটি টকা নগদ ধন আৰু ১৫ কেজি সোণ

ডিজিটেল ডেস্ক: পশ্চিমবংগ আৰক্ষীয়ে বীৰভূম জিলাৰ এজন ব্যক্তিৰ বাসগৃহত চলোৱা এক অভিযানত প্ৰায় ২৯ কোটি টকা নগদ ধন আৰু ১৫ কিলোগ্ৰাম সোণ উদ্ধাৰ কৰিছে। তেওঁ পূৰ্বতে চৰকাৰী বাছৰ চালক আছিল। বীৰভূম জিলাত মঙলবাৰৰ নিশা আৰম্ভ হোৱা এই আৰক্ষীৰ অভিযান পিছদিনা গোটেই দিনটো চলি বুধবাৰৰ সন্ধিয়ালৈকে অব্যাহত থাকে আৰু নগদ ধন গণনা কৰিবলৈ ১৮ ঘণ্টাৰো অধিক সময় লাগে। প্ৰাক্তন বাছ চালকজনৰ নাম মিনাৰ মণ্ডল বুলি চিনাক্ত কৰা হৈছে। আৰক্ষীয়ে বীৰভূমৰ মহম্মদ বজাৰৰ দেউচাত থকা তেওঁৰ বাসগৃহত এই অভিযান চলায়।

কি কি উদ্ধাৰ হ’ল?

পশ্চিম বংগ আৰক্ষীয়ে প্ৰকাশ কৰা মতে, অভিযানত ২৮.৫ কোটি টকা নগদ ধন আৰু ১৫ কিলোগ্ৰাম সোণ উদ্ধাৰ কৰা হৈছে। এই অভিযানৰ সময়ত আৰক্ষীয়ে কমেও পাঁচটা টকা গণনা কৰা মেচিন আৰু পাঁচটা লোহাৰ বাকচ ব্যৱহাৰ কৰে। বীৰভূমৰ আৰক্ষী অধীক্ষক বিদিত ৰাজ ভুন্দেছে জনোৱা মতে, ঘৰটোৰ ৩৫ টা নাইলন বেগৰ পৰা এই নগদ ধনসমূহ উদ্ধাৰ কৰা হৈছে আৰু দেৱালৰ কাষতো টকাৰ বাণ্ডিলবোৰ থুপ খোৱাই থোৱা আছিল। তেওঁলোকৰ মতে, মিনাৰ মণ্ডল হৈছে বীৰভূমৰ অভিযুক্ত শিল আৰু বালি ছিণ্ডিকেটৰ গুৰি ধৰোতা টুল্লু মণ্ডলীৰ এজন আত্মীয়।

বাসগৃহটো দেখাত বীৰভূমৰ মহম্মদ বজাৰৰ এটা সাধাৰণ দুমহলীয়া ঘৰৰ দৰেই আছিল। কিন্তু টুল্লু মণ্ডলৰ সৈতে মিনাৰৰ সম্পৰ্ক তদন্তকাৰী সংস্থাসমূহৰ চকুত পৰাৰ পিছতে ঘৰটো তদন্তৰ আওতালৈ আহে। উল্লেখ্য যে, টুল্লু মণ্ডল আছিল তৃণমূল কংগ্ৰেছৰ প্ৰাক্তন নেতা অনুব্রত মণ্ডলৰ এজন ঘনিষ্ঠ সহযোগী। বিশেষভাৱে উল্লেখযোগ্য যে, অনুব্রতে এই মাহৰ আৰম্ভণিতে ঋতব্রত বেনাৰ্জীৰ নেতৃত্বাধীন বিদ্ৰোহী শিবিৰত যোগদান কৰিছিল। অনুব্রত আছিল সেই অঞ্চলত প্ৰাক্তন মুখ্যমন্ত্ৰী মমতা বেনাৰ্জীৰ এজন প্ৰভাৱশালী ব্যক্তি আৰু এক দশকৰো অধিক সময় ধৰি বীৰভূমৰ টিএমচিৰ জিলা সভাপতি আছিল।

পশ্চিম বংগৰ মুখ্যমন্ত্ৰী শুভেন্দু অধিকাৰীয়ে ‘এক্স’ (X) যোগে আৰক্ষীৰ এই কাৰ্যত প্ৰশংসা কৰে। তেওঁ কয় যে দুৰ্নীতিৰ বিৰুদ্ধে তেওঁৰ চৰকাৰৰ অভিযানৰ অংশ হিচাপে এই পদক্ষেপ লোৱা হৈছে আৰু ‘শূন্য সহনশীলতা নীতি’ৰে ই অব্যাহত থাকিব। “অবৈধ বালি মাফিয়াৰ বিৰুদ্ধে চলোৱা অভিযানৰ বাবে আমাৰ আইন বলবৎকাৰী বাহিনীৰ প্ৰশংসনীয় কাম। বিশ্বাসযোগ্য তথ্যৰ ভিত্তিত সঠিক অভিযান চলাই বীৰভূম আৰক্ষীয়ে মহম্মদ বজাৰ আৰক্ষী থানাৰ অধীনত অবৈধ বালি মাফিয়া টুল্লু মণ্ডল ওৰফে মহম্মদ নজিবুদ্দিনৰ আশ্ৰয়স্থলক লক্ষ্য কৰি এক বৃহৎ অভিযান চলায়।” 

তেওঁ লগতে কয়, “জনসাধাৰণৰ সম্পদ জনসাধাৰণৰেই, আৰু যিসকলে ইয়াক লুণ্ঠন কৰিব তেওঁলোকে আইনৰ সম্পূৰ্ণ সন্মূখীন হ’ব লাগিব। সতৰ্কতা আৰু আপোচহীন পদক্ষেপ অব্যাহত থাকিব। মাফিয়া ছিন্ডিকেটৰ বিৰুদ্ধে এই অভিযান চলি থাকিব।”