নিৰ্বাচনী হিংসা! বিজেপি কৰ্মীৰ আক্ৰমণত গুৰুতৰভাৱে আহত ‘ৰাইজৰ দল’ৰ সদস্য

শিৱসাগৰ : উপ-নিৰ্বাচনৰ বতাহে বাৰুকৈ কোবাইছে থাওৰা বিধানসভা সমষ্টি৷ উপ-নিৰ্বাচনৰ প্ৰচাৰ শেষ হোৱা পাছতে আৰম্ভ হয় নিৰ্বাচনী হিংসা৷ সমষ্টিটোৰ অন্তৰ্গত বকতা অঞ্চলত বৃহস্পতিবাৰে 'ৰাইজৰ দল'ৰ কৰ্মীৰ ওপৰত বিজেপি কৰ্মীৰ আক্ৰমণৰ অভিযোগ উত্থাপিত হৈছে৷

জানিব পৰা মতে, বিজেপিৰ কৰ্মী ৰঞ্জিত তিখৰিয়ালৰ লাঠিৰ কোবত গুৰুতৰভাৱে আহত ৰাইজৰ দলৰ সদস্য সঞ্জীৱ খঙীয়া। বকতা নেমুগুৰি পঞ্চায়তৰ চুতীয়া কাটনীত এই ঘটনা সংঘটিত হয়৷ ৰাইজৰ দলৰ সদস্য সঞ্জীৱ খঙীয়াক ঘৰলৈ আহি থকা অৱস্থাত বিজেপি দলৰ সদস্য ৰঞ্জিত তিখৰীয়ালে ৰখাই মাৰপিট কৰাত আঘাতপ্ৰাপ্ত ৰাইজৰ দলৰ কৰ্মীজন৷ ইতিমধ্যে ঘটনা সম্পৰ্কত ৰাইজৰ দলৰ কৰ্মী সঞ্জীৱ খঙীয়াই বকতা নেমুগুৰি আৰক্ষী থানাত এজাহাৰ দাখিল কৰিছে৷

ইফালে, বকতা থানাৰ অন্তৰ্গত ঢেকেৰীছিগাত ৰাইজৰ দলৰ কৰ্মীৰ বিৰুদ্ধে সুৰা আৰু ধন বিতৰণৰ অভিযোগ উঠিছে৷ সন্তোষ মৰাণ নামৰ এজন ব্যক্তিৰ বিৰুদ্ধে ধন আৰু সুৰা বিতৰণৰ অভিযোগ তুলিছে বিজেপি আৰু চিপিআই দলে৷ সন্তোষ মৰাণৰ AR 01 E 6064 নম্বৰৰ স্ক'ৰপিঅ' গাড়ীখন জব্দ কৰি ফ্লায়িং স্কোৱাডক খবৰ দিয়ে দুই দলৰ কৰ্মীয়ে৷ আৰক্ষীৰ তালাচীত গাড়ীখনৰপৰা উদ্ধাৰ ২ হাজাৰ টকা আৰু ৩ টা সুৰাৰ বটল৷ ইয়াৰ পাছতে বকতা নেমুগুৰি থানাত সোধপোছ বাবে লৈ আনে সন্তোষ মৰাণক।