পূজাৰ আনন্দৰ মাজতে অঘটন , লণ্ডভণ্ড দেৱীৰ প্ৰতিমা , সংঘৰ্ষত নিহত তিনিজন

ডিজিটেল ডেস্ক : পূজাৰ আনন্দ-উল্লাসৰ মাজতে সংঘটিত হৈছে ভয়ংকৰ অঘটন । ভালেমান দুৰ্গা পূজাৰ মণ্ডপত দুষ্কৃতিকাৰীয়ে সংঘটিত কৰিছে আক্ৰমণ। ভালেমান দুৰ্গা পূজা মণ্ডপত দুষ্কৃতিকাৰীয়ে দেৱী দুৰ্গাৰ মূৰ্তিত আক্ৰমণ কৰি ক্ষতিসাধন কৰাৰ চাঞ্চল্যকৰ বাতৰি প্ৰকাশ পাইছে। সাম্প্ৰদায়িক সংঘাতৰ আশংকা বৃদ্ধি কৰি তোলা এনে ঘটনা সংঘটিত হৈছে বাংলাদেশৰ দুৰ্গা পূজাৰ মণ্ডপত। স্থানীয় সংবাদ মাধ্যমে এনে সংঘাতৰ বাতৰি প্ৰকাশ কৰিছে।

এটা পূজা মণ্ডপত কোৰানক অৱমাননা কৰা বুলি ছ’চিয়েল মিডিয়াত প্ৰচাৰ হোৱাৰ পাছতে বিভিন্ন ঠাইত বিক্ষিপ্ত হিংসাত্মক ঘটনাৰ সূত্ৰপাত ঘটে। প্ৰথমে কমিল্লা চহৰৰ নানুৱাৰ দিঘী লেকৰ সমীপৰ দুৰ্গা পূজাত সূত্ৰপাত হয় সংঘাতৰ। তাৰ পাছতে চান্দপুৰৰ হাজিগঞ্জ, চট্টগ্ৰামৰ বাঞ্চখালী আৰু কক্স বজাৰৰ পেকুৱাৰ দুৰ্গা পূজা মণ্ডপত উদ্ভণ্ডালি চলায় একাংশ দুষ্কৃতিকাৰীয়ে। দুৰ্গা মূৰ্তি ভাঙি পেলোৱাৰ লগতে ভক্ত-পুৰোহিতৰ ওপৰতো আক্ৰমণ চলায় এইসকল লোকে। আৰক্ষীৰ সৈতেও সংঘৰ্ষত লিপ্ত হয় একাংশ লোক।
এই সাম্প্ৰদায়িক সংঘাতসদৃশ পৰিস্থিতি দমন কৰাৰ বাবে আৰক্ষীয়ে কন্দুৱা গেছ আৰু ৰবৰ বুলেট নিক্ষেপ কৰিবলগীয়া পৰিস্থিতিৰ সৃষ্টি হয়। এই সংঘাতপূৰ্ণ পৰিস্থিতিত কমেও তিনিজন লোক নিহত হোৱা বুলি প্ৰকাশ পাইছে।

এই সংঘাতৰ সূত্ৰপাত হোৱা অঞ্চলবোৰত ৰেপিড একচন ফ’ৰ্চকে ধৰি অতিৰিক্ত নিৰাপত্তাবাহিনী নিয়োগ কৰা হৈছে। বাংলাদেশৰ হিন্দু ইউনিটী কাউন্সিলে সদৰি কৰা মতে, দুৰ্গা পূজা মণ্ডপত কোৰানক অৱমাননা কৰা বুলি চলা অপপ্ৰচাৰৰ পাছতে এই সংঘৰ্ষৰ সূত্ৰপাত ঘটে। তেওঁলোকে এই ঘটনাক লৈ তীব্ৰ উদ্বেগ প্ৰকাশ কৰিছে। ইতিমধ্যে বাংলাদেশ চৰকাৰে এই ঘটনাৰ তদন্তৰ নিৰ্দেশ দিছে আৰু সকলোকে শান্তি সম্প্ৰীতি বজাই ৰাখিবলৈ আহ্বান জনাইছে।