ডিজিটেল ডেস্ক: সাংবাদিকৰ কণ্ঠৰুদ্ধ কৰাৰ এক অশুভ পৰম্পৰাই গা কৰি উঠিছে ভাৰতত৷ আমেৰিকা যুক্তৰাষ্ট্ৰৰ এক অপেছাদাৰী সমিতি ‘টু প্ৰটেক্ট জাৰ্নালিষ্ট (চিপিজে)’ৰ এক প্ৰতিবেদনত প্ৰকাশ পাইছে চাঞ্চল্যকৰ তথ্য৷ চলিত বৰ্ষত ভাৰতত ৪ জন সাংবাদিকক তেওঁলোকৰ বৃত্তিৰ বাবে 'হত্যা' কৰা হৈছে৷ প্ৰতিবেদনত বিশ্ব প্ৰেক্ষাপটত এই বছৰটোক সংবাদ মাধ্যমৰ স্বাধীনতাৰ বাবে এক 'ধূসৰ বছৰ' বুলি অভিহিত কৰা হৈছে৷ কালি প্ৰকাশিত এই প্ৰতিবেদনত কোৱা হৈছে যে ভাৰতত এই বছৰ সাংবাদিকৰ বৃত্তিৰ "প্ৰতিশোধ" হিচাপে নিহত হোৱা সাংবাদিকৰ সংখ্যা সৰ্বাধিক।
যোৱা ১ ডিচেম্বৰলৈ এই বৰ্ষত ভাৰতত চাৰিজন সাংবাদিকক হত্যা কৰা হৈছে৷ সংবাদ মাধ্যমৰ স্বাধীনতা আৰু সংবাদ মাধ্যমৰ ওপৰত আক্ৰমণৰ ওপৰত চলোৱা চিপিজেৰ বাৰ্ষিক সমীক্ষাত এই তথ্য পোহৰলৈ আহিছে। হত্যাৰ বলি হোৱা চাৰিগৰাকী ভাৰতীয় সাংবাদিক হৈছে- নৱেম্বৰত অবিনাশ ঝা (বিএনএন নিউজ), আগষ্টত চেন্নাকেচাভালু (ইভি5) আৰু মনীষ সিং (সুদৰ্শন টিভি), আৰু জুনত সুলভ শ্ৰীবাস্তৱ (এবিপি নিউজ)। দেশত ক্ৰমবৰ্ধমান সাংবাদিক নিগ্ৰহৰ ঘটনাই সচেতন সমাজত প্ৰতিক্ৰিয়াৰ সৃষ্টি কৰিছে৷
সাংবাদিকতাৰ নিৰপেক্ষতা আৰু প্ৰাথমিক চৰিত্ৰত ৰাজনৈতিক হস্তক্ষেপে সাংবাদিকতা বৃত্তিটোৰ প্ৰতি প্ৰশ্নবোধকৰ সৃষ্টি কৰিছে৷ সাংবাদিকতাত ৰাজনৈতিক হস্তক্ষেপ আৰু প্ৰভাৱ বিস্তাৰে সংবাদ জগতলৈ নমাই আনিছে অন্ধকাৰ৷ ৰাইজৰ পৰা দূৰলৈ গৈছে সাংবাদিকতা৷ আৰু তাত হাত উজান দিছে একাংশ সাংবাদিকেই৷
বাক-স্বাধীনতা হৰণ কৰিব খোজা হৈছে সাংবাদিকৰ লগতে জনসাধাৰণৰো৷ এতিয়া চৰকাৰৰ ভুল-ক্ৰুটী আঙুলিয়াই দিয়া মানেই দেশদ্ৰোহ বুলি কোৱা হয়৷ যিটো ভাৰতৰ সুস্থ গণতান্ত্ৰিক পৰম্পৰাৰ পৰিপন্থী৷ সাংবাদিকক হত্যা পৰ্যন্ত কৰা হৈছে বিশ্বৰ সৰ্ববৃবৎ গণতান্ত্ৰিক দেশ ভাৰতত৷ গণতন্ত্ৰৰ চতুৰ্থ স্তম্ভৰ ওপৰত এনে আক্ৰমণে সামাজিক প্ৰেক্ষাপটত বিৰূপ প্ৰভাৱ পেলোৱাৰ উপৰি ভাৰতৰ গণতান্ত্ৰিক ব্যৱস্থাটোৰ প্ৰতিও নিশ্চিত ভাবুকি কঢ়িয়াই আনিব বুলি আশংকা কৰা হৈছে৷
Continue Reading
