সামৰিক দমনৰ বিৰুদ্ধে যুঁযুধান স্থিতি; সেনাক নিষিদ্ধ ঘোষণা কৰিলে কোন সংগঠনে?

ডিজিটেল ডেস্ক : দেশত পুনৰ আৰম্ভ হৈছে অসহযোগ আন্দোলন। সামৰিক দমনৰ বিৰুদ্ধে ক্ষোভ প্ৰকাশ কৰি আৰম্ভ কৰা হৈছে অসহযোগ আন্দোলন। এইবাৰ এই আন্দোলনৰ কেন্দ্ৰস্থল হৈ পৰিছে নগালেণ্ড। নগালেণ্ডত সামৰিক বাহিনীয়ে ১৪জনকৈ নিৰীহ লোকক হত্যা কৰাৰ পাছত এই ঘটনাক লৈ উত্তেজনা মাৰ যোৱা নাই। সেনাৰ এই দু্ষ্কাৰ্যৰ বিৰুদ্ধে তীব্ৰ বিষোদগাৰ অব্যাহত ৰাখিছে ক্ষুদ্ধ নগা জনগণে। সামৰিক বাহিনী বিশেষ ক্ষমতা আইন প্ৰত্যাহাৰ কৰা আৰু দোষী সেনাৰ লোকক শাস্তি বিহাৰ দাবীত অটল হৈ আছে নাগা জনগণৰ লগতে নাগালেণ্ড চৰকাৰ।

এই দাবীৰ তীব্ৰতা প্ৰতিধ্বনিত হৈছে উত্তৰ পূবৰ আন আন প্ৰান্তলৈও। কিন্তু যি দৃঢ়তাৰে নগালেণ্ডৰ জনগণে সেনাৰ বিৰু্দ্ধে তেওঁলোকৰ প্ৰতিবাদী কাৰ্যসূচী অব্যাহত ৰাখিছে সেয়া অতুলনীয়।এইবাৰ ৰাজ্যখনৰ এটা গুৰুত্বপূৰ্ণ সংগঠনে সামৰিক বাহিনীৰ সৈতে অসহযোগ কাৰ্যসূচী ঘোষণা কৰিছে। এটা আগশাৰীৰ জনজাতীয় সংগঠনে অসহযোগ আন্দোলনৰ কথা ঘোষণা কৰিছে সামৰিক বাহিনীৰ বিৰুদ্ধে। কন্যাক নাগা জনজাতিৰ শীৰ্ষ সংগঠন দ্য কন্যাক ইউনিয়নে তেওঁলোকৰ এলেকাত ভাৰতীয় সেনাৰ উপস্থিতি, টহল অদি সম্পূৰ্ণৰূপে নিষিদ্ধি ঘোষণা কৰিছে।

কন্যাক জনগোষ্ঠীৰ লোকৰ বসতিপ্ৰধান অঞ্চলত সেনাই প্ৰৱেশ কৰিব নোৱাৰিব বুলি সংগঠনটোৱে ঘোষণা কৰিছে। যেতিয়ালৈকে সেনাৰ অবাঞ্চিত আৰু নিৰ্বিচাৰ আক্ৰমণত নিহতসকলে ন্যায় লাভ নকৰে তেতিয়ালৈ এই নিষেধাজ্ঞা আৰোপ কৰাৰ কথা ঘোষণা কৰিছে। কন্যাক লোকসকলে সেনাৰ পৰা কোনোধৰণৰ সহায়-সাহায্য গ্ৰহণ নকৰে বুলিও স্পষ্ট কৰি দিছে। আনকি মন জিলাত কোনো সামৰিক নিযুক্তি ৰেলী অনুষ্ঠিত কৰিবলৈ নিদিয়াৰো হুংকাৰ দিছে সংগঠনটোৱে। নগা সংগঠনটোৰ এনে যুঁযুধান ৰূপে অঞ্চলটোৰ পৰিস্থিতিৰ অধিক অৱনতি ঘটোৱাৰ আশংকা আছে। কিন্তু সেনাৰ দমনমূলক আচৰণ আৰু বৰ্বৰতাৰ বিৰুদ্ধে এনে কঠোৰতাৰ বিকল্প নাই বুলিও সৰৱ চৰ্চা চলিছে।