শিশু নিৰ্যাতনকাৰীক লৈ গুৰুত্বপূৰ্ণ ৰায়...

নতুন দিল্লী: শিশু নিৰ্যাতনৰ বিৰুদ্ধে এক গুৰুত্বপূৰ্ণ ৰায় প্ৰদান৷ বৃহস্পতিবাৰে উচ্চতম ন্যায়ালয়ে বোম্বে উচ্চ ন্যায়ালয়ৰ ৰায়ক খাৰিজ কৰি পছক’ৰ অধীনত যৌননির্যাতনৰ অপৰাধৰ কাৰণে শাৰীৰিক সম্পর্ক তথা শৰীৰ স্পর্শৰ আৱশ্যকতা নাই বুলি গুৰুত্বপূর্ণ ৰায় দিছে৷

উল্লেখ্য যে, বোম্বে উচ্চ ন্যায়ালয়ে পছক’ আইনৰ অধীনত যৌননির্যাতনৰ অপৰাধৰ কাৰণে শাৰীৰিক সম্পর্কৰ আৱশ্যক আছে বুলি ৰায় দিছিল যদিও সেই ৰায় খাৰিজ কৰি উচ্চতম ন্যায়ালয়ৰ ন্যায়াধীশ ইউ ইউ ললিত, এছ ৰবীন্দ্র ভাট আৰু বেলা ত্রিবেদীৰ বিচাৰপীঠে যৌননির্যাতনৰ অপৰাধৰ কাৰণে শাৰীৰিক সম্পর্কৰ আৱশ্যকতা নাই বুলি ৰায় দিয়ে৷

বিচাৰপীঠে কয় যে, আইনখন যৌন অপৰাধৰ পৰা শিশুক সুৰক্ষাৰ বাবেই বলৱৎ কৰা হৈছে৷ বোম্বে উচ্চ ন্যায়ালয়ৰ নাগপুৰ বিচাৰপীঠে ১২জানুৱাৰীত পছক’ আইনৰ অধীনত যৌননির্যাতনৰ অপৰাধৰ কাৰণে শাৰীৰিক সম্পর্কৰ আৱশ্যক আছিল বুলি দিয়া ৰায়ৰ প্রত্যাহ্বান জনাই কেন্দ্র, ৰাষ্ট্রীয় মহিলা আয়োগ আৰু মহাৰাষ্ট্র চৰকাৰে উচ্চতম ন্যায়ালয়ত আবেদন জনাইছিল৷ এই আবেদনৰ শুনানি নিৰীক্ষণ কৰি বৃহস্পতিবাৰে উচ্চতম ন্যায়ালয়ে বোম্বে উচ্চ ন্যায়ালয়ৰ ৰায়ক খাৰিজ কৰে৷