ডিজিটেল ডেস্কঃ সোমবাৰে কৃষি আইন বাতিল বিধেয়কক লৈ উত্তাল হৈ পৰিছিল দুয়োখন সদন। চৰকাৰে মৌখিক ভোটত আইন তিনিখন বাতিলৰ বাবে গৃহীত কৰে বিধেয়ক। কিন্তু বিৰোধীয়ে বিষয়়টো সন্দৰ্ভত সংসদত আলোচনা হোৱাটো বিচাৰিছিল যদিও সেয়া হৈ নুঠিল। ফলত চিৰাচৰিতভাৱে প্ৰৱল হুলস্থূলীয়া পৰিস্থিতিৰ সৃষ্টি হ’ল সংসদত। ৰাজ্যসভাত হুলস্থুল সৃষ্টি কৰা আৰু নিয়ম উলংঘা কৰাৰ বাবে শীতকালীন অধিৱেশনৰ পৰা বহিষ্কাৰ কৰা হ'ল বিৰোধীৰ ১২গৰাকীকৈ সাংসদক। ইয়াৰ পাছতেই প্ৰিয়ংকা চতুৰ্বেদী আৰু শশী থাৰুৰে সংসদ টিভি ত্যাগ কৰিছে।
প্ৰিয়ংকা চতুৰ্বেদী শিৱসেনাৰ এগৰাকী সাংসদ যিয়ে ১২ জন বিৰোধী সাংসদৰ ভিতৰত হুলস্থুল সৃষ্টি কৰা আৰু নিয়ম উলংঘা কৰাৰ বাবে শীতকালীন অধিৱেশনৰ পৰা নিলম্বিত হৈছে। চতুৰ্বেদীয়ে সেয়েহে সংসদৰ টিভি এংকৰ পদৰ পৰা পদত্যাগ কৰিছে। প্ৰিয়ংকা চতুৰ্বেদীয়ে লোকসভা টিভি আৰু ৰাজ্যসভা টিভিৰ নতুন সংস্কৰণ সংসদ টিভি মুকলি কৰাৰ পিছৰে পৰা এটা অনুষ্ঠানৰ সঞ্চালনা কৰি আহিছে। শিৱসেনাৰ সাংসদ প্ৰিয়ংকা চতুৰ্বেদীৰ পাছত কংগ্ৰেছ সাংসদ শশী থাৰুৰেও সংসদ টিভিৰ এংকৰ পদৰ পৰা পদত্যাগ কৰিছে। থাৰুৰে সংসদৰ শীতকালীন অধিৱেশনৰ পৰা ১২ জন সাংসদক নিলম্বন কৰাত অসন্তুষ্টি প্ৰকাশ কৰি এই সিদ্ধান্ত লৈছে।
তেওঁ কৈছিল যে এই ১২ জন সাংসদৰ নিলম্বন প্ৰত্যাহাৰ নকৰালৈকে তেওঁ সংসদ টিভিত এটা অনুষ্ঠানো আয়োজন নকৰে। থাৰুৰে দীৰ্ঘদিন ধৰি সংসদৰ টিভি অনুষ্ঠান 'টু দ্য পইণ্ট' আয়োজন কৰি আহিছে। তিৰুৱন্তপুৰমৰ সাংসদ শশী থাৰুৰে কয়, "মই বিশ্বাস কৰিছিলো যে সংসদ টিভিৰ অনুষ্ঠান আয়োজনৰ আমন্ত্ৰণ গ্ৰহণ কৰাটো ভাৰতৰ সংসদীয় গণতন্ত্ৰৰ সৰ্বশ্ৰেষ্ঠ পৰম্পৰাসমূহৰ ভিতৰত অন্যতম। ই এই সিদ্ধান্তক নিশ্চিত কৰে যে আমাৰ ৰাজনৈতিক পাৰ্থক্যই আমাক বিভিন্ন সংসদীয় প্ৰতিষ্ঠানত সম্পূৰ্ণৰূপে অংশগ্ৰহণ কৰাত বাধা নিদিয়ে। কিন্তু যেতিয়ালৈকে ১২ জন সাংসদৰ নিলম্বন প্ৰত্যাহাৰ নকৰে তেতিয়ালৈকে সংসদ টিভিত মোক দেখা নাপাব।
উল্লেখ্য যে নিলম্বিত সদস্যসকলৰ ভিতৰত আছে কংগ্ৰেছৰ ছয়জন, তৃণমূল কংগ্ৰেছ আৰু শিৱসেনাৰ দুজনকৈ, আৰু চিপিআই আৰু চিপিএমৰ এজনকৈ। এই নিলম্বনক "অগণতান্ত্ৰিক আৰু উচ্চ সদনৰ সকলো প্ৰক্ৰিয়া বিধি উলংঘা" বুলি অভিহিত কৰি ৰাহুল গান্ধীকে ধৰি বিৰোধীসকলে যোৱা সপ্তাহত সংসদত মহাত্মা গান্ধীৰ প্ৰতিমূৰ্তিৰ সন্মুখত ক'লা আৰ্মবেণ্ড পিন্ধি এক প্ৰতিবাদ সাব্যস্ত কৰিছিল।
