ব্ৰহ্মপুত্ৰত নতুন মাছৰ প্ৰজাতি আৱিষ্কাৰ

ডিজিটেল ডেস্ক : বৈজ্ঞানিকসকলৰ এটা দলে ডিব্ৰুগড়ৰ মাইজানত ব্রহ্মপুত্র নদীত চাইপ্রিনিড মাছৰ এটা নতুন প্ৰজাতি আৱিষ্কাৰ কৰিছে। যিয়ে উত্তৰ-পূব ভাৰতৰ নদী প্ৰণালীৰ সমৃদ্ধ মৎস্য প্রাণীজগতৰ বৈচিত্র্যত আৰু এটা প্রজাতি সংযোজন কৰিছে।

নতুনকৈ আৱিষ্কৃত প্ৰজাতিটোৰ নাম ডিব্ৰুগড়ৰ সৈতে সংলগ্ন কৰি 'পেথিয়া ডিব্রুগড়েনসিছ' (Pethia dibrugarhensis) ৰখা হৈছে। উল্লেখযোগ্য যে ICAR-কেন্দ্রীয় অন্তর্দেশীয় মৎস্য গৱেষণা প্রতিষ্ঠান (ICAR-CIFRI), আঞ্চলিক কেন্দ্র, গুৱাহাটী, ICAR-CIFRI, বেৰাকপুৰ আৰু মণিপুৰ বিশ্ববিদ্যালয়ৰ গৱেষকসকলে ব্ৰহ্মপুত্ৰ নদীৰ সাম্প্ৰতিক মিঠাপানীৰ প্রাণীজগত সমীক্ষাৰ সময়ত এই প্ৰজাতিৰ মাছ ধৰা পৰে।

এই আৱিষ্কাৰৰ তথ্য স্প্রিংগাৰ নেচাৰৰ আন্তর্জাতিক সমীক্ষিত পত্রিকা নেশ্যনেল একাডেমি ছায়েন্স লেটাৰ্ছত প্রকাশিত হৈছে। নতুনকৈ চিহ্নিত কৰা প্ৰতিটো প্রজাতিয়ে উত্তৰ-পূব ভাৰতৰ জটিল জলজ বাস্তুতন্ত্রসমূহ আৰু ভালকৈ বুজাত সহায় কৰিব। এনেধৰণৰ পদ্ধতিগত সমীক্ষা পৰিৱেশগত পৰিৱৰ্তনৰ ভাবুকিৰ সন্মুখীন হোৱাৰ আগতে এই প্রজাতিসমূহ নথিভুক্ত কৰা আৰু সংৰক্ষণ কৰাৰ বাবে অপৰিহাৰ্য বুলি গৱেষক দলৰ এজন সদস্যই জনায়।

গৱেষণা কৰা দলত আছিল ICAR-CIFRIৰ পৰিচালক ড° বসন্ত কুমাৰ দাস, ICAR-CIFRI আঞ্চলিক কেন্দ্ৰ, গুৱাহাটীৰ বিজ্ঞানী ড° নিতি শর্মা আৰু ড° সীমাংকু বৰা আৰু মণিপুৰ বিশ্ববিদ্যালয়ৰ প্ৰখ্যাত মিঠাপানীৰ শ্ৰেণীবিজ্ঞানী প্ৰফেছৰ ডব্লিউ বিশ্বনাথ আৰু পেথিয়া বিশেষজ্ঞ ড° এম দিম্মা।

তথ্য মতে, পেথিয়া ডিব্রুগড়েনসিছ চাইপ্রিনিডে পৰিয়ালৰ অন্তৰ্গত আৰু ইয়াক বাৰ্ব হিচাপে শ্রেণীবিভাজন কৰা হৈছে। এই প্রজাতিটো বালি আৰু শিলৰ লগত মিহলি হৈ থকা কাদোৰে গঠিত তলৰ স্তৰৰ সৈতে মধ্যমীয়া দ্রুতগতিত বৈ যোৱা পানীত বাস কৰা দেখা গৈছে। 'এই নতুন প্ৰজাতিৰ পৃথকীকৰণ বৈশিষ্ট্যসমূহে ইয়াক ইয়াৰ সমগোত্রীয়সকলৰ মাজত অতি অনন্য কৰি তুলিছে। আমি ইয়াক অসম্পূর্ণ পার্শ্বীয় ৰেখা, পুচ্ছ পেডাংকলৰ পৃষ্ঠীয় আৰু অধৰৰ ফালে বিস্তৃত এটা স্বতন্ত্র কৃষষ্ণ দাগ আৰু হিউমাৰেল চিহ্ন আৰু বার্বেল উভয়ৰে অনুপস্থিতিসহ নির্দিষ্ট আকৃতিগত বৈশিষ্ট্যসমূহৰ সংমিশ্ৰণৰ ভিত্তিত চিহ্নিত কৰিছোঁ,' এজন দলৰ সদস্যই জনায়। এই আৱিষ্কাৰে ভাৰতৰ অন্যতম জৈৱ-বৈচিত্ৰ্যপূৰ্ণ নদী প্রণালী ব্রহ্মপুত্ৰ অৱবাহিকাত নথিভুক্ত মাছৰ প্ৰজাতিৰ বর্ধমান তালিকাত এক উল্লেখযোগ্য অৱদান প্রতিনিধিত্ব কৰে।

তিব্বত, ভাৰত আৰু বাংলাদেশৰ মাজেৰে বৈ যোৱা ব্ৰহ্মপুত্র নদীয়ে অসংখ্য স্থানীয় প্রজাতিক সমর্থন কৰে আৰু সমগ্ৰ অঞ্চলত মিঠাপানীৰ মাছৰ জনসংখ্যাৰ বাবে এক গুৰুত্বপূৰ্ণ আৱাসস্থল হিচাপে কাম কৰিব।

উৎসঃ দৈনিক জনমভূমি