পৃথিৱী এতিয়া সাংবাদিকৰ বাবে অনুকূল হৈ থকা নাই! এবছৰত বিশ্বত ৪৬ গৰাকীক হত্যা

ডিজিটেল ডেস্ক: বিশ্বৰ এটা স্বেচ্ছাসেৱী সংগঠন ‘ৰিপ’ৰ্টছ উইডাউট বৰ্ডাৰ্ছ’ৰ এক গৱেষণাত পোহৰলৈ আহিছে চাঞ্চল্যকৰ তথ্য৷ চলিত বছৰত বিশ্বজুৰি ৪৬গৰাকী পেছাদাৰী সাংবাদিকক হত্যা কৰা হৈছে৷ লগতে, কাৰাদণ্ড বিহা হৈছে ৪৮৮গৰাকী সাংবাদিকক৷ আন্তঃৰাষ্ট্ৰীয় প্ৰতিষ্ঠানটোৱে প্ৰতিবছৰে সাংবাদিক নিৰ্যাতনৰ তথ্য প্ৰকাশ কৰি আহিছে৷

এই তথ্যই এতিয়া এটা কথাই স্পষ্ট কৰিছে যে, পৃথিৱী এতিয়া সাংবাদিকৰ বাবে অনুকূল হৈ থকা নাই৷ এই বিষয়টোৱে এতিয়া উদ্বিগ্ন কৰিছে বিশ্বৰ সংবাদজগতত৷ সাংবাদিকৰ কণ্ঠৰুদ্ধ কৰাৰ এক অশুভ পৰম্পৰাই এতিয়া বিশ্বৰ প্ৰতি প্ৰান্ততে শিপাইছে৷ অলপতে, আমেৰিকা যুক্তৰাষ্ট্ৰৰ এক অপেছাদাৰী সমিতি ‘টু প্ৰটেক্ট জাৰ্নালিষ্ট (চিপিজে)’ৰ এক প্ৰতিবেদনতো প্ৰকাশ পাইছিল ভাৰতত সাংবাদিক হত্যাৰ তথ্যৰ পৰিসংখ্যা৷ চলিত বৰ্ষত ভাৰতত ৪জন সাংবাদিকক তেওঁলোকৰ বৃত্তিৰ বাবে ‘হত্যা’ কৰা হৈছে৷

সাংবাদিকতাৰ নিৰপেক্ষতা আৰু মৌলিক চৰিত্ৰত আঘাতে সাংবাদিকতা বৃত্তিটোৰ প্ৰতি সংশয় নমাই আনিছে৷
বাক-স্বাধীনতা হৰণ কৰিব খোজা হৈছে সাংবাদিকৰ৷ চৰকাৰৰ ভুল-ক্ৰুটী আঙুলিয়াই দিয়া মানেই দেশদ্ৰোহ বুলি কোৱা পৰম্পৰাৰ আৰম্ভণি হৈছে৷ যিটো সুস্থ গণতান্ত্ৰিক পৰম্পৰাৰ পৰিপন্থী৷ গণতন্ত্ৰৰ চতুৰ্থ স্তম্ভৰ ওপৰত এনে আক্ৰমণে সামাজিক প্ৰেক্ষাপটত বিৰূপ প্ৰভাৱ পেলোৱাৰ উপৰি গণতান্ত্ৰিক বিধি ব্যৱস্থাৰ প্ৰতিও নিশ্চিত ভাবুকি কঢ়িয়াই আনিব বুলি আশংকা কৰা হৈছে৷