অসম চৰকাৰৰ উদ্যোগত অসমৰ প্ৰাক্তন মুখ্যমন্ত্ৰী গোলাপ বৰবৰাৰ জন্ম শতবাৰ্ষিকী অনুষ্ঠান

ডিজিটেল ডেস্ক :কলাক্ষেত্ৰত অসম চৰকাৰৰ উদ্যোগত অসমৰ প্ৰাক্তন মুখ্যমন্ত্ৰী গোলাপ বৰবৰাৰ জন্ম শতবাৰ্ষিকী অনুষ্ঠান । বৰেণ্য অসমীয়া গোলাপ বৰবৰাৰ জন্ম শতবাৰ্ষিকী অনুষ্ঠানৰ মুখ্য অতিথি কেন্দ্ৰীয় গৃহ মন্ত্ৰী অমিত শ্বাহ ।

ভূপেন হাজৰিকাৰ মানুহে মানুহৰ বাবে গীতেৰে গোলাপ বৰবৰাক স্মৰণ অমিত শ্বাহৰ। জৰুৰীকালণ সময়ত সকলোৱে আন্দোলন কৰিছিল তেওঁ সেই আন্দোলনত জপিয়াই পৰিছিল। এটা ভোটত জয়ী হৈ তেওঁ ৰাজ্যসভালৈ গৈছিল ।

তেওঁ কয়- মই এইমাত্ৰ হিমন্ত বিশ্ব শৰ্মাৰ পৰা জানিব পাইছো তেওঁ ভূপেন হাজৰিকাৰ এটা নিৰ্দলীয় ভোটেৰে জয়ী হৈছিল। মই হিমন্ত বিশ্ব শৰ্মা আৰু চৰকাৰক ধন্যবাদ জনাইছো তেওঁলোকে গোলাপ বৰবৰাৰ এই জন্ম শতবাৰ্ষিকী এনেদৰে উৎযাপন কৰিছে।

তেওঁ আগলৈ কয়-গোলাপ বৰবৰাৰ আমাৰ দলৰ সৈতে কোনো সম্পৰ্ক নাই তথাপিও আজি অসম চৰকাৰে তেওঁক এনেদৰে সন্মান যাচিছে । জৰুৰীকালীন সময়ত সৰ্বপ্ৰথমে জেললৈ যোৱা আৰু জৰুৰীকালীন নাইকিয়া হোৱাৰ পিছত একেবাৰে শেষত জেলৰ পৰা ওলোৱা নেতা গোলাপ বৰবৰা । অলপ সময়ৰ কাৰণে তেওঁ মুখ্যমন্ত্ৰী হ'ল কিন্তু সেই অলপ সময়ত বহু ঐতিহাসিক পদক্ষেপ লৈছিল গোলাপ বৰবৰাই ।

আজি অসমৰ শিক্ষা খণ্ডৰ পৃষ্ঠা লুটিয়াই চালে ৭৮ চনৰ তেখেতৰ শাসনকাল অসমৰ শিক্ষা খণ্ডৰ বিকাশৰ অন্যতম কাৰণ । অসমত গোলাপ বৰবৰাৰ চৰকাৰৰ পূৰ্বে অসমৰ মানুহে পাৰ্ছপোট বনাবলৈ কলকাতালৈ যাব লাগিছিল । অসমৰ প্ৰথমে বাংলাদেশী চিনাক্ত তেওঁৰ দিনতে হৈছিল । ৩৬৭৮০ গৰাকী বাংলাদেশীক চিনাক্ত কৰা হৈছিল গোলাপ বৰবৰাৰ দিনত ।

আজিও ভাৰতত অবৈধ বাংলাদেশী চিনাক্তকৰণ হৈ আছে কিন্তু বহু দলে ইয়াক বিৰোধীতা কৰি আহিছে । অসম চৰকাৰক হাজাৰ প্ৰশংসা চৰকাৰী ভূমি বেদখলমুক্ত কৰাৰ বাবে । ১২৬ হাজাৰ একৰ ভূমি অসম চৰকাৰে বেদখলমুক্ত কৰিছে ।

অকল কাজিৰঙাৰ ভূমিয়ে নহয় শংকৰদেৱ মাধৱদেৱৰ সত্ৰৰ ভূমিওঁ বেদখলমুক্ত কৰিছে অসম চৰকাৰে । অসমত প্ৰথম নিৰ্বাচনী প্ৰচাৰত প্ৰতিশ্ৰুতি দিছিলো ১০ বছৰত কৰিব নোৱাৰিলো । কিন্তু মই প্ৰতিশ্ৰতি দিছো আগন্তুক দেশত সমগ্ৰ দেশক অবৈধ বিদেশীমুক্ত কৰিম-এনেদৰে কলাক্ষেত্ৰত অনুষ্ঠিত গোলাপ বৰবৰাৰ জন্ম শতবাৰ্ষিকী অনুষ্ঠানৰ মুখ্য অতিথি কেন্দ্ৰীয় গৃহ মন্ত্ৰী অমিত শ্বাহে তেওঁৰ মন্তব্য আগবঢ়ায় ।

প্ৰাক্তন মুখ্যমন্ত্ৰী গোলাপ বৰবৰা সম্পৰ্কে কিছু তথ্য

জীৱনী

জন্মঃ ২৯ আগষ্ট ১৯২৫

পিতৃৰ নামঃ কমল বৰবৰা

জন্মস্থানঃ গোলাঘাট

শিক্ষা

তিনিচুকীয়াৰ চেনাইৰাম উচ্চ মাধ্যমিক বিদ্যালয়ৰ পৰা ১৯৪৪ চনত মেট্রিক পৰীক্ষাত উত্তীর্ণ

কলিকতা বিশ্ববিদ্যালয়ৰ বংগবাসী মহাবিদ্যালয়ৰ পৰা ১৯৪৭ চনত বিজ্ঞান শাখাত ইণ্টাৰমেডিয়েট সম্পূর্ণ ।

কর্মজীৱন

কিছুদিনৰ বাবে আছাম অইল কোম্পানীৰ শ্রম বিভাগত, তিনিচুকীয়াৰ চেনাইৰাম হাইস্কুলৰ শিক্ষক হিচাপে আৰু দা আছাম ট্রিবিউন কাকতত সাংবাদিক হিচাপে সেৱা আগবঢ়াইছিল ৰাজনৈতিক জীৱন। ১৯৪৭ চনত সমাজবাদী পার্টিত যোগদান, ১৯৬৫ চনত সংযুক্ত ছ'চিয়েলিষ্ট পার্টীৰ ৰাষ্ট্ৰীয় সাধাৰণ সম্পাদকৰূপে নির্বাচিত, ১৯৬৮ চনত ৰাজ্যসভালৈ নির্বাচিত,১২ মার্চ ১৯৭৮ চনৰ পৰা ৪ ছেপ্টেম্বৰ ১৯৭৯ চনলৈ অসমৰ মুখ্যমন্ত্রী হিচাপে কার্যনির্বাহ কৰে । তেওঁ এন এফ ৰে'লৱেৰ মজদুৰ সংঘৰ সভাপতি , অসমৰ হিন্দ মজদুৰ সভাৰ সভাপতি আছিল ।

জীৱন, ৰাজনীতি আৰু আদর্শ

গোলাপ বৰবৰাৰ জন্ম হৈছিল ১৯২৫ চনৰ ২৯ আগষ্টত, গোলাঘাটত। বৰবৰাৰ মাথোঁ তিনি বছৰ বয়সতে তেওঁলোকৰ পৰিয়ালটো তিনিচুকীয়ালৈ গুচি আহে। তেখেতৰ দেউতাক অসম অইল কোম্পানীৰ এজন কৰ্মচাৰী আছিল। ১৯৩৯ চনত ব্রিটিছ মালিকীস্বত্বৰ বিৰুদ্ধাচৰণ কৰি ঔদ্যোগিক ধর্মঘটৰ নেতৃত্ব দি গোলাপ বৰবৰাৰ দেউতাকে নিজৰ চাকৰি হেৰুৱাবলগীয়া হৈছিল। বৰবৰাৰ আজোককাক মায়াৰাম বৰবৰা ১৮৫৭ চনৰ ভাৰতৰ প্ৰথম স্বাধীনতা যুঁজৰ সময়ত মণিৰাম দেৱানৰ সহযোগী আছিল।

পৰিয়ালৰ জ্যেষ্ঠসকলৰ নিদৰ্শনেৰে উদ্বুদ্ধ হৈ বৰবৰায়ো কুমলীয়া বয়সতে স্বাধীনতা সংগ্ৰামত জঁপিয়াই পৰে। দশম শ্রেণীত পঢ়ি থাকোঁতে ১৯৪২ চনৰ ভাৰত ত্যাগ আন্দোলনত অংশগ্রহণ কৰি তেখেতে গ্ৰেপ্তাৰ হ'বলগীয়া হৈছিল। কালক্রমত, গোলাপ বৰবৰা উচ্চ শিক্ষাৰ বাবে কলিকতালৈ যায়। তাতে তেখেতে ৰামমনোহৰ লোহিয়া, জয়প্রকাশ নাৰায়ণৰ দৰে নেতাৰ সান্নিধ্য লাভ কৰে আৰু স্বাধীনতাৰ সমসাময়িকভাবে তেওঁলোকে গঠন কৰা সমাজবাদী দলত যোগদান কৰে।

জীৱনকালত বৰবৰাই অসংখ্য আন্দোলনত অংশগ্ৰহণ কৰিছিল। তাৰ ভিতৰত, দৈয়াং অঞ্চলত বাস কৰা ভূমিহীন লোকসকলক ভূমিৰ অধিকাৰ প্ৰদানৰ দাবীত সত্যাগ্রহ, অসমত নতুন শোধনাগাৰ স্থাপনৰ দাবীৰে শোধনাগাৰ আন্দোলন, ১৯৭৪ চনৰ ঐতিহাসিক ৰেল ধর্মঘট, জৰুৰীকালীন অবস্থা (১৯৭৫-৭৭)ত সংগ্রাম, অসম আন্দলন আদি প্রধান। স্মর্তব্য যে, জৰুৰীকালীন অৱস্থাত তেখেত প্রায় ১৯ মাহ কাৰাবন্দী হৈ আছিল।

১৯৬৮ চনত গোলাপ বৰবৰা অসমৰ পৰা ৰাজ্যসভালৈ বিবোধী পক্ষৰ প্রথমজন সদস্য হিচাপে নির্বাচিত হয়। অৱধাৰিতভাৱে তেখেতে সংসদৰ মজিয়াত অসমৰ লগতে দেশৰ ভিন্ন প্ৰান্তৰ নাগৰিকৰ সমস্যা তথা বিশ্বজনীন বিষয়সমূহো সাবলীল আৰু শক্তিশালী ৰূপত দাঙি ধৰিছিল। জৰুৰীকালীন অৱস্থাৰ পাছত বৰবৰাৰ নেতৃত্বাধীন জনতা দলে কংগ্রেছক ক্ষমতাচ্যুত কৰে আৰু ১৯৭৮ চনৰ ১২ মার্চ তাৰিখে গোলাপ বৰবৰাই অসমৰ প্ৰথমজন অ-কংগ্ৰেছী মুখ্যমন্ত্রী হিচাপে শপত গ্রহণ কৰে।

বৰবৰা চৰকাৰে তেওঁলোকৰ চমু কার্যকালত বহুকেইটা গুৰুত্বপূর্ণ সিদ্ধান্ত গ্রহণ কৰে। কাৰ্যভাৰ গ্ৰহণ কৰিয়েই মুখ্যমন্ত্রী গোলাপ বৰবৰাই দশম শ্রেণী পর্যন্ত সকলো ছাত্র-ছাত্রীৰ বাবে বিনামূলীয়া শিক্ষা প্ৰদানৰ ব্যৱস্থা হাতত লয়। বৰবৰা চৰকাৰখনৰ আন কেইটামান দৃঢ় আৰু জনমুখী সিদ্ধান্ত হ'ল দৰিদ্ৰ লোকৰ বাবে সম্পূর্ণ বিনামূলীয়া স্বাস্থ্যসেবা, ১০ বিঘা পর্যন্ত মাটিৰ ভূমি ৰাজহ বেহাই, ৰাজ্যত ক্ষুদ্র চাহ বাগিচা স্থাপনৰ নীতি প্ৰৱৰ্তন, ৰাজ্যৰ যোগ্য যুৱক-যুবতীসকল নিয়োজিত হ'ব পৰাকৈ অসমত বেংকিং সেৱা নিযুক্তি ব'ৰ্ড আৰু উত্তৰ-পূব সীমান্ত ৰে'লৱে নিযুক্তি ব'র্ড গঠন ইত্যাদি।

এনে যুগান্তকাৰী পদক্ষপসমূহ গ্ৰহণ কৰাৰ পাছতো বৰবৰা চৰকাৰে কাৰ্যকাল সম্পূর্ণ কৰিব নোৱাৰিলে। অসমৰ জনসাধাৰণৰ জাতীয় পৰিচয় ৰক্ষাৰ্থে অবৈধ অনুপ্ৰৱেশৰ সমস্যাটোৰ বিৰুদ্ধে আপোচবিহীন স্থিতি গ্রহণ কৰাই আছিল বৰবৰা চৰকাৰৰ পতনৰ অন্যতম কাৰণ। অবৈধ অনুপ্ৰৱেশৰ বিৰুদ্ধে গোলাপ বৰবৰাই গ্ৰহণ কৰা পদক্ষেপে ভোটাৰ তালিকাত এনে সন্দেহজনক ব্যক্তিৰ দ্বাৰা লাভান্বিত হোৱা বহু ৰাজনৈতিক লোকৰ ব্যক্তিস্বাৰ্থৰ প্ৰতি ভাবুকি কঢ়িয়াই আনিছিল।

ফলত তেওঁলোকে বৰবৰা চৰকাৰখনক ওফৰাই পেলোৱাৰ ষড়যন্ত্র বচনা কৰে। এই অপশক্তিসমূহে গোলাপ বৰবৰাক ক্ষমতাৰ পৰা অপসাৰণ কৰাত সফল হ'ল যদিও তেখেতে আঙুলিয়াই দিয়া গুরুত্বপূর্ণ সমস্যাটোরে জনসচেতনতাৰ সৃষ্টি কৰি অসম আন্দোলনক অধিক তীব্ৰতৰ কৰি তুলিলে।

মুখ্যমন্ত্ৰীৰ আসন ত্যাগ কৰাৰ পাছতো গোলাপ বৰবৰাই অসমীয়া ৰাইজৰ পক্ষত থাকি অসমীয়াৰ পৰিচয় তথা অসমৰ সভ্যতা-সংস্কৃতিৰ সুৰক্ষাৰ হকে চিৰদিন যুঁজ দি গ'ল।

ৰাজপথলৈ ওলাই যাবলৈকো কুণ্ঠাবোধ নকৰা কৰ্মতৎপৰ বৰবৰাই নিজ কলমেৰে আমৰণ সত্য প্ৰতিষ্ঠাৰ প্ৰয়াস কৰিছিল। নৈতিকতা আৰু প্ৰমূল্যবোধৰ ৰাজনীতিৰে এগৰাকী মুখ্যমন্ত্রী হিচাপে বৰবৰাই দেখুৱাই থৈ যোৱা আদর্শ, শাসন-ব্যৱস্থা আৰু প্রায় অর্ধ শতিকাৰ পূৰ্বেই তেখেতে উনুকিয়াই থৈ যোৱা দিশসমূহ নিশ্চয়কৈ অসমৰ ৰূপান্তৰৰ যাত্ৰাত মূল আধাৰ হিচাপে পৰিগণিত হ'ব। গোলাপ বৰবৰাৰ জন্ম শতবার্ষিকীৰ ক্ষণত তেখেতৰ জীৱন-কীর্তি, ৰাজনীতি আৰু আদর্শ এখন উন্নত আৰু শক্তিশালী অসম গঢ়িবলৈ প্ৰতিগৰাকী অসমীয়াৰ সমল হওক।

বৰবৰাৰ মন্ত্ৰীসভাৰ বৈঠকত গ্ৰহণ কৰা কেইটামান ঐতিহাসিক সিদ্ধান্ত

১৩ মার্চ ১৯৭৮

১০ বিঘা পর্যন্ত কৃষিভূমিৰ ৰাজহ ৰেহাইৰ ব্যৱস্থা কৰা হয়। ১৯৭২ চনত ভূমি ৰাজহত আৰোপ কৰা ৩০% অতিৰিক্ত কৰ বাহাল ৰখা হয় যদিও এই নীতি বিলোপৰ বাবে ব্যবস্থা গ্রহণ

ৰাজ্যিক চিকিৎসালয় আৰু ডিচপেনছেৰীত প্ৰতিজন ৰোগীৰ ওপৰত ২৫ পইচাকৈ আৰোপ কৰা কৰ বিলোপকৰণ

দশম শ্রেণী পর্যন্ত বিনামূলীয়া শিক্ষাৰ সুবিধা প্রদান

২০ মার্চ ১৯৭৮

১৯৭৭ চনৰ ডিচেম্বৰ মাহত হোৱা চৰকাৰী কৰ্মচাৰীৰ অৱস্থান ধর্মঘট কার্যসূচীত অংশগ্রহণ নকৰা চৰকাৰী কৰ্মচাৰীলৈ প্ৰদান কৰি থকা আগতীয়া বানচ ৰদ আৰু কৰ্তন

১৭ জুন ১৯৭৮

ছুটীত থকা বা কর্তব্যত থকা ৰাজ্য চৰকাৰৰ কৰ্মচাৰী আৰু ৰাজ্যৰ বাহিৰত বাস কৰা চৰকাৰী পেঞ্চনাৰক চিকিৎসাজনিত সুবিধা

৪ আগষ্ট ১৯৭৮

মে' দিৱসক বেতনসহ ৰাষ্ট্ৰীয় বন্ধ হিচাপে ঘোষণা কৰাৰ প্ৰস্তাৱ