ডিজিটেল ডেস্কঃ বিবাহ যাত্ৰীৰ গাড়ীৰ সৈতে এখন ট্ৰাকৰ মুখামুখী সংঘৰ্ষ হোৱাৰ ফলতএটি ডেৰ বছৰীয়া শিশুসহ এটা পৰিয়ালৰ কমেও ১১ জন লোক নিহত হৈছে। বুধবাৰে নিশা ছত্তীশগড়ৰ বালোদ জিলাত সংঘটিত হয় এই ভয়াৱহ দুৰ্ঘটনাটো ।
আৰক্ষীয়ে প্ৰকাশ কৰা মতে ঘটনাস্থলীতে দহজন লোকৰ মৃত্যু হয়। চিকিৎসালয়লৈ নিয়াৰ পথত আন এজন লোকৰ মৃত্যু হয়। মৃতসকলৰ ভিতৰত আছে কেশৱ চাহু (৩৪), দোমেশ ধ্ৰুৱ (১৯), সন্ধ্যা চাহু (২৪), ৰাম চাহু (২০), শৈলেন্দ্ৰ চাহু (২২), লক্ষ্মী চাহু (৪৫), ধৰ্মৰাজ চাহু (৫৫), ঊষা চাহু (৫২), কিয়াতমান্স চাহু (৩) আৰু ডেৰ বছৰীয়া ঈশান চাহু।
আৰক্ষীয়ে জনোৱা অনুসৰি নিহত আটাইকেইজন ধামতাৰী জিলাৰ সোৰাম-ভাটগাঁৱৰ আছিল। পৰিয়ালটোৱে এখন এছইউভিৰে কাঙ্কেৰ জিলাৰ মাৰ্কাটোলা গাঁৱৰ এক বিবাহ অনুষ্ঠানলৈ গৈ আছিল। ঘটনাটো বুধবাৰে নিশা পুৰু আৰক্ষী থানা অঞ্চলৰ অন্তৰ্গত জগতাৰা গাঁৱৰ ওচৰৰ ৩০ নং ৰাষ্ট্ৰীয় ঘাইপথত সংঘটিত হয়।এজন প্ৰত্যক্ষদৰ্শীয়ে প্ৰকাশ কৰা মতে ৰাষ্ট্ৰীয় ঘাইপথেৰে গাড়ীখনে তীব্ৰ গতিত যাত্ৰা কৰিছিল। হঠাতে ট্ৰাকৰ সৈতে বাহন খনৰ সংঘৰ্ষ হয়।
দুৰ্ঘটনাৰ ফলত এছ.ইউ.ভি. খন ট্ৰাকৰ তলত সোমাই পৰে৷ লগে লগে কাষৰীয়া এলেকাৰ লোকসকলে ঘটনাস্থলীলৈউপস্থিত হৈ উদ্ধাৰ অভিযান আৰম্ভ কৰে। কিন্তু গাড়ীখন ইমানেই চূৰ্ণ-বিচূৰ্ণ হৈ পৰিছিল যে কাকো বাহিৰলৈ উলিয়াই অনাটো সম্ভৱ হোৱা নাছিল। আৰক্ষী ঘটনাস্থলীত উপস্থিত হৈ মেছিনেৰে গাড়ীখন কাটি মৃতদেহবোৰ উদ্ধাৰ কৰে৷ দুৰ্ঘটনাটোৰ পিছৰে পৰা ট্ৰাকৰ চালকজনৰ কোনো সন্ধান এতিয়ালৈকে পোৱা হোৱা নাই।
Continue Reading
